ᐊᐳᖅᑎᓐᓈᖅᑐᖅ

ᐊᐳᖅᑎᓐᓈᖅᑐᖅ ᖃᒪᓂ’ᑐᐊᑉ ᖃᓂᖓᓃᑦᑐᖅ ᐊᒡᓂᒍ-ᐃᒍ ᐅᔭᕋᖕᓂᐊᖅᑐᓕᕆᔨᒃᑯᖏᑦᑕ ᐊᖏᓂᖅᐹᖑᓪᓗᓂ ᐅᔭᕋᖕᓂᐊᕐᕕᖓ. 3.5 ᒥᓕᔭᓐ ᐊᐅᓐᔅ ᐅᖓᑖᓂ ᒎᓘᖃᖅᑐᖅ ᐱᑕᖃᕐᓂᖅᓴᒻᒪᕆᐊᓘᒍᓐᓴᖅᖢᓂ. ᐅᔭᕋᖕᓂᐊᕐᕕᒃ 70 ᑭᓛᒥᑕᓂᒃ ᐅᖓᓯᖕᓂᓕᒃ ᖃᒪᓂ’ᑐᐊᑉ ᐅᐊᖕᓇᖓᓄᑦ. ᐊᐳᖅᑎᓐᓈᖅᑐᖅ ᐊᑉᖁᑎᖃᖅᑐᖅ ᐅᑭᐅᓗᒃᑖᒃᑯᑦ ᐊᑐᖅᑕᐅᔪᓐᓇᖅᑐᒥᒃ 110 ᑭᓛᒥᑕᒥᒃ ᑕᑯᓂᖃᖅᖢᓂ ᐊᑉᖁᑎ ᖃᒪᓂ’ᑐᐊᕐᒥᙶᖅᑐᖅ. ᒥᑦᑕᕐᕕᖃᖅᖢᓂᓗ ᑕᐃᑲᓂ ᐅᔭᕋᖕᓂᐊᕐᕕᖕᒥ ᑎᑭᑎᑦᑎᔪᓐᓇᖃᑦᑕᖁᑉᓗᒋᑦ ᓂᕿᓂᒃ, ᐱᖁᑎᓂᒃ ᐊᒻᒪᓗ ᑎᑭᑎᑦᑎᔪᓐᓇᖃᑦᑕᕈᒪᓂᕐᒧᑦ ᓴᓇᔨᓂᒃ ᓴᓇᓲᑦ ᐅᑎᖅᑕᖅᐸᒃᖢᑎᒃ. ᑕᒪᕐᒥᒃ ᐃᒡᓗᕐᔪᐊᑦ ᓇᑉᐸᖅᑎᖅᑕᐅᓯᒪᔪᑦ ᐅᔭᕋᖕᓂᐊᕐᕕᒡᓗ. ᓇᔪᖅᑕᐅᔪᑦ ᐃᒡᓗᑦ ᑕᐃᒪᐅᔪᑦ ᓴᓇᔭᐅᓯᒪᔪᑦ, ᐱᖃᐃᓕᓴᕐᕕᒃᑕᖃᖅᖢᓂ ᐊᒻᒪᓗ ᐱᙳᐊᕐᕕᖕᒥ ᓇᔪᖅᑕᐅᔪᓐᓇᖅᑐᖅ ᐃᒡᓗ 400 ᐅᖓᑖᓃᑦᑐᓄᑦ ᓴᓇᔨᓄᑦ ᐊᑕᐅᑦᑎᒃᑯᑦ.

ᐸᕐᓇᐅᑕᐅᓯᒪᔪᖅ ᐅᔭᕋᖕᓂᐊᕈᒪᓂᕐᒧᑦ ᑲᒪᔪᒪᓂᕐᒧᓪᓗ 8,500 ᑕᓐᓂᒃ ore-ᒥᒃ ᐅᑉᓗᑕᒫᒃᑯᑦ ᓴᖅᑭᑎᑦᑎᐅᓪᓗᓂ 350,000 ᐊᐅᔅᓂᒃ ᒎᓗᓂᒃ ᐊᕐᕌᒍᑕᒫᒃᑯᑦ 9-ᓄᑦ ᐊᕐᕌᒍᓄᑦ ᐅᔭᕋᖕᓂᐊᕐᕕᒃ ᐅᒃᑯᐃᙶᖅᑎᓪᓗᒍ. ᑲᒻᐸᓂᐅᔪᖅ ᓇᓂᓯᔪᓐᓇᕐᓂᐊᕋᓱᒋᓯᒪᔪᖅ 5 000 000 ᐊᐅᓐᔅᓂᒃ ᒎᓘᓂᒃ ᐊᐳᖅᑎᓐᓈᖅᑐᒥ ᐊᒻᒪᓗ ᑲᔪᓯᑎᑦᑎᔪᒪᓪᓗᑎᒃ ᐅᔭᕋᖕᓂᐊᕐᕕᖕᒥ 2019 ᐅᖓᑖᓄᑦ.

ᐊᒡᓂᒍ-ᐃᒍ ᐅᔭᕋᖕᓂᐊᕐᕕᒃ ᓂᕆᐅᒃᑐᖅ ᐊᑯᓂ ᐱᓕᕆᖃᑎᒌᑦᑎᐊᕐᓂᒃᑯᑦ ᐱᕚᓪᓕᖅᑎᑦᑎᔪᒪᓂᕐᒧᑦ ᓄᓇᖅᑲᑎᒌᖕᓂᒃ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓂ. ᐱᒋᐊᕐᓂᖓᓂ, ᐅᔭᕋᒃᓯᐅᕐᓂᖓ ᐱᔭᓪᓕᐊᑎᑦᑎᓂᖓᓗ ᐱᓕᕆᐊᖑᓯᒪᔪᑦ ᓴᐳᓐᓂᐊᕈᒪᓪᓗᑎᒃ ᑭᕙᓪᓕᐅᑉ ᐊᔾᔨᐅᖏᑦᑐᒃᑯᑦ ᐊᕙᑎᖓᓂ ᐆᒪᔪᖏᓐᓂᒡᓗ. ᐅᔭᕋᖕᓂᐊᕐᕕᒃ ᓴᓇᑎᑦᑎᔪᒪᔪᖅ 450 ᐃᓄᖕᓂᒃ 40% ᓄᓇᓕᖕᓂᙶᕋᔭᖅᖢᑎᒃ. ᐊᐳᖅᑎᓐᓈᖅᑐᖅ ᐱᕚᓪᓕᖅᑎᑦᑎᓂᐊᖅᑑᔭᖅᑐᖅ ᐱᒻᒪᕆᐊᓗᒃᑯᑦ ᐊᒡᓂᒍ-ᐃᒍ ᐅᔭᕋᖕᓂᐊᖅᑐᓕᕆᔨᒃᑯᖏᓐᓂᒃ ᐊᒻᒪᓗ ᓄᓇᓕᖕᓂ.