ᐱᒋᐊᕐᕕᐊ

ᖃᒪᓂ’ᑐᐊᖅ, ᓄᓇᒦᑦᑐᖅ ᖃᒪᓂ’ᑐᐊᑉ ᑰᖓᑕ ᐹᖓᓂ, ᑲᓇᑕᐅᑉ ᕿᑎᐊᓃᑦᑎᐊᖅᑐᖅ. 320 ᑭᓛᒥᑕᒥᒃ ᓄᓇᒦᓐᓂᖃᖅᑐᖅ ᑕᓯᐅᔭᕐᔪᐊᑉ ᑲᓇᖕᓇᖓᓄᑦ ᑭᕙᓪᓕᕐᒥ ᓄᓇᕗᒥ.

ᖃᒪᓂ’ᑐᐊᖅ ᖃᐅᔨᒪᔭᐅᑦᑎᐊᖅᑐᖅ ᑎᑎᕋᐅᔭᖅᑎᖏᑦᑎᒍᑦ ᒥᖅᓱᖅᑎᖏᑦᑎᒍᓪᓗ ᓴᓇᙳᐊᖅᑎᖏᑦᑎᒍᓪᓗ. ᖃᐅᔨᒪᔭᐅᑦᑎᐊᖅᑐᒥᒃ ᑎᑎᕋᐅᔭᕐᕕᖃᖅᖢᓂ ᖁᕝᕙᖅᑎᕆᕝᕕᐅᕙᒃᑐᒥ ᓴᓇᙳᐊᖅᑕᐅᓯᒪᔪᓄᑦ, ᓲᕐᓗ ᐃᓄᐃᑦ ᐃᑦᓴᕐᓂᑕᖃᕐᕕᖓ, ᔨᐊᓯ ᐅᓈᖅ ᑎᑎᕋᐅᔭᖃᕐᕕᖓ, ᐊᒻᒪᓗ ᓴᓇᙳᐊᕐᕕᒃ ᓄᓇᓕᖕᒦᑦᑐᑦ ᓴᓇᙳᐊᕐᓂᕐᒧᑦ ᐱᓕᕆᕝᕕᓪᓚᑦᑖᑦ.

ᖃᒪᓂ’ᑐᐊᖅ ᓄᓇᒥ ᐱᓕᕆᕝᕕᐅᔪᓐᓇᓪᓚᕆᖕᒥᔪᖅ, ᐊᒃᑐᖅᓯᓯᒪᓪᓚᕆᒃᑐᖅ ᐱᕙᓪᓕᐊᔪᓕᕆᓂᒃᑯᑦ ᖃᒪᓂ’ᑐᐊᕐᒥ. ᓴᖅᑭᑎᑕᐅᓂᖓ ᐊᐳᖅᑎᓐᓈᖅᑑᑉ ᐅᔭᕋᖕᓂᐊᕐᕕᖓᑕ, ᓴᓇᕝᕕᒃᓴᖅᑖᖅᑎᑦᑎᓯᒪᓪᓚᕆᒃᑐᖅ ᓄᓇᖅᑲᑎᒌᖕᓄᑦ. ᐱᕕᒃᓴᕆᔭᐅᔪᑦ ᑕᐃᒪᒃᑲᓐᓂᒻᒪᕆᐊᓗᐃᑦ ᓄᓇᓕᐅᑉ ᐃᓗᐊᓂ ᐊᒻᒪᓗ ᐅᔭᕋᖕᓂᐊᕐᕕᖕᒥ, ᐃᒻᒪᖄ 70 ᑭᓛᒥᑕᒥᒃ ᐅᖓᓯᖕᓂᓕᒃ ᖃᒪᓂ’ᑐᐊᕐᒥ. ᐊᐅᓚᑦᑎᔨᐅᓂᕐᒧᑦ ᐃᒐᓂᒃᑯᑦ ᓄᓇᒃᑰᕈᑎᕐᔪᐊᓂᒃ ᐊᖁᔪᓐᓇᕐᓂᒃᑯᑦ, ᓄᓇᓕᐅᑉ ᕼᐊᒻᓚᒋᔭᖓ ᐱᓕᕆᓪᓚᑦᑖᓕᖅᑐᖅ ᓴᖅᑭᑎᑦᑎᔪᒪᓪᓗᓂ ᐃᓕᓐᓂᐊᕈᑎᒃᓴᓂᒃ ᐸᕐᓇᐃᔪᒪᓪᓗᑎᒃ ᓄᓇᖅᑲᑎᒥᓂᒃ ᓴᓇᕝᕕᒃᓴᓄᑦ ᐊᒻᒪᓗ ᓇᖕᒥᓂᖅᑖᖅᑐᕈᓐᓇᕐᓂᕐᒧᑦ ᐊᑐᐃᓐᓇᐅᔪᓂᒃ.

ᖃᒪᓂ’ᑐᐊᕐᒧᑦ ᑎᑭᑉᐸᓪᓕᐊᓂᖅ: ᑳᒻ ᐃᐊᒃᑯᑦ ᑎᖕᒥᓲᓕᕆᔨᒃᑯᑦ, ᕘᔅ ᐃᐊᒃᑯᑦ ᐊᒻᒪᓗ ᑭᕙᓪᓕᖅ ᐃᐊᒃᑯᑦ ᕕᓂᐲᒃᒥᙶᓲᑦ ᑲᖏᖅᖠᓂᕐᒥᓗ. ᖃᖓᑕᓂᐅᕙᒃᑐᑦ ᑕᑯᒋᐊᕈᓐᓇᖅᑕᑎᑦ ᑐᑭᓯᒋᐊᒃᑲᓐᓂᕈᒪᒍᕕᑦ.