ᐃᑦᓴᕐᓂᑕᐃᑦ ᐱᓱᓗᒡᕖᑦ ᐊᒻᒪᓗ ᐃᓂᐅᔪᑦ

ᐱᓱᓗᒡᕖᑦ ᑕᑯᓐᓇᖅᑐᑦ ᐃᑦᓴᕐᓂᑕᓕᕆᓂᕐᒧᑦ ᐃᓄᐃᑦ ᐃᓕᖅᑯᓯᑐᖃᖓᓄᓪᓗ. ᐱᓱᓗᒡᕖᑦ ᑎᑭᓐᓇᖅᑐᑦ ᖃᑉᓯᑲᓪᓚᖕᓄᑦ ᐊᐅᔭᐅᒃᑯᑦ ᐃᓂᒋᔭᐅᕙᒃᑐᓄᑦ. ᑎᑎᕋᐅᔭᖅᓯᒪᔪᑦ ᒪᓕᒃᑕᒃᓴᑦ ᓇᓗᓇᐃᔭᐅᑎᑦ ᑐᑭᓯᒋᐊᖅᑎᑦᑎᓯᒪᕙᒃᑐᑦ ᐃᓂᒋᔭᐅᔪᓂᒃ ᑎᑭᑉᐸᓕᓪᐊᓂᕐᒧᑦ; ᐊᐱᖅᑯᑕᐅᔪᓐᓇᖅᑐᑦ ᐊᑯᒪᓕᒃ ᐳᓚᕋᕐᕕᖕᒥ ᑕᐃᒪᐅᔪᑦ ᐊᒥᓲᓕᖅᑎᖅᓯᒪᔪᑦ.

ᐱᓱᓗᒡᕕᒃ ᑕᑯᓂᖓᒍᑦ ᐊᔾᔨᒌᖏᑦᑑᑕᐅᔪᖅ, ᑭᓯᐊᓂ ᐸᕐᓇᒃᓯᒪᔭᕆᐊᖃᕋᔭᖅᑐᑎᑦ ᒪᕐᕉᖕᓄᑦ ᐊᕐᕕᓂᓕᖕᓄᑦ ᐃᑲᕐᕋᓄᑦ ᐱᓱᒐᔭᕐᓂᕐᒧᑦ. ᑕᒪᕐᒥᒃ ᓇᓗᓇᐃᔭᐃᕝᕕᐅᓯᒪᔪᑦ ᓇᐅᒃᑰᕆᐊᖃᕐᓂᕐᒧᑦ ᐃᓄᒃᓱᐃᑦ ᓇᓗᓇᐃᒃᑯᑕᐅᓪᓗᑎᒃ. ᐱᓱᓗᒃᖢᓂ, ᑕᑯᓐᓇᖅᑐᖅ ᐅᔭᖅᑲᓄᑦ ᓴᓇᓯᒪᔪᓂᒃ ᖃᔭᕐᓂᒃ ᓇᐸᔪᓂᒃ, ᑐᐱᖃᕐᕕᕕᓂᕐᓂᒃ, ᑎᕆᒐᓂᐊᖅᓯᐅᕐᕕᐅᖃᑦᑕᖅᓯᒪᔪᓂᒃ, ᐊᒻᒪᓗ ᐱᕈᔭᕕᓂᕐᓂ, ᑕᒪᕐᒥᒃ ᑕᑯᑎᑦᑎᓯᒪᔪᑦ ᐃᓄᐃᑦ ᐊᔪᖏᓐᓂᕆᔭᒻᒪᕆᐊᓗᖏᓐᓂᒃ ᐊᑐᖅᑕᐅᖃᑦᑕᖅᓯᒪᔪᓂᒃ ᓄᓇᒥ ᐊᒃᓱᕈᕐᓇᖃᑦᑕᖅᓯᒪᑎᓪᓗᒍ.

ᐅᔾᔨᖅᑐᑦᑎᐊᕐᓗᑎᑦ ᐸᒡᕕᓵᕆᖏᓪᓗᒋᑦ ᑕᐃᓱᒪᓂᑐᕐᒧᑦ ᐊᒃᑐᐊᓂᓖᑦ. ᕿᒪᖃᑦᑕᕐᓗᒋᑦ ᐊᓯᔾᔨᖅᓯᒪᙱᓪᓗᒋᑦ, ᖁᕕᐊᒋᔭᐅᔪᓐᓇᕐᓂᐊᕐᒥᖏᒪᑕ ᐊᓯᖕᓄᑦ ᑎᑭᖃᑦᑕᕐᓂᐊᖅᑐᓄᑦ.

ᐱᓱᒡᓗᑎᑦ ᐱᓱᓗᒡᕕᒃᑯᑦ ᓄᓇᑐᐃᓐᓇᒃᑯᓪᓘᓐᓃᑦ ᓄᓇᓕᐅᑉ ᖃᓂᖓᓂ, ᐅᔾᔨᖅᑐᖃᑦᑕᕐᓗᑎᑦ ᐅᑉᓗᕐᓂᒃ, ᑭᒡᒐᕕᐊᕐᔪᖕᓂᒃ ᐊᔾᔨᒋᖏᑦᑑᑕᐅᔪᓄᓪᓗ ᑎᖕᒥᐊᓄᑦ. ᖃᒪᓂ’ᑐᐊᓕᐊᕈᕕᑦ ᒪᐃᒥ, ᖁᐸᓄᐊᓂᒃ ᑕᑯᓪᓚᕆᒐᔭᖅᑐᑎᑦ ᐊᒻᒪᓗ ᐊᓯᖏᓐᓂᒃ ᓄᓇᒥ.