ᐃᓕᖅᑯᓯᑐᖃᑎᒍᑦ ᐊᐅᔭᒃᑯᑦ ᓄᓇᒦᔾᔪᔾᔭᐅᓂᖅ

ᓄᓇ ᐊᒥᓱᓂᒃ ᐅᑭᐅᒐᓴᒻᒪᕆᐊᓗᖕᓂᒃ ᐊᑐᖅᑕᐅᓯᒪᓕᖅᑐᒥ, ᐃᖏᕐᕋᔭᒃᖢᓂ ᖃᐅᔨᓇᓱᒃᖢᓂ ᐃᓄᐃᑦ ᐅᓂᑉᑳᖅᑐᐊᖃᑦᑕᖅᓯᒪᔪᑦ. ᐃᓄᖕᓄᑦ, ᑕᐃᑉᓱᒪᓂᑐᖃᐅᓚᐅᖅᑐᖅ ᐃᓂᒋᔭᐅᔪᒨᕐᓂᖅᓴᐅᖕᒪᑦ ᐱᕕᒃᓴᖃᕐᓂᕐᒨᖏᑦᑐᖅ. ᐃᖅᑲᐅᒪᓂᐅᔪᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐊᒻᒪᓗ ᓅᑲᑕᖃᑦᑕᓚᐅᖅᑎᓪᓗᒋᑦ ᐃᓄᐃᑦ ᐆᒪᔪᑦ ᒪᓕᒃᖢᒋᑦ ᐃᓅᕌᓂᒍᑎᒋᓯᒪᔭᖓ. ᐃᓄᐃᑦ ᐃᓕᖅᑯᓯᑐᖃᖓ ᐃᖅᑲᐅᒪᔭᐅᕙᒃᑐᖅ ᓇᓃᓐᓂᕆᓯᒪᔭᖏᓐᓄᑦ ᓄᓇᒥ ᐊᑐᖅᓯᒪᔭᖏᓐᓄᑦ ᑕᐃᒪᙵᓂᐊᓗᒃ: ᑐᒃᑐᖃᖅᑐᐊᓘᓯᒪᔪᒥ ᐃᖃᓗᖃᑦᑎᐊᖅᓯᒪᔪᒥᓗ.

ᖃᒪᓂ’ᑐᐊᑉ ᐃᓕᖅᑯᓯᑐᖃᑎᒍᑦ ᐊᐅᔭᒃᑯᑦ ᓄᓇᖁᑎᖓ ᐃᖅᑲᐅᒪᓂᐅᔪᖅ ᐃᓅᓯᕆᔭᐅᓚᐅᖅᑐᒥ ᓄᓇᒥ. ᓄᓇᒦᓐᓂᐅᕙᒃᑐᖅ ᐃᓄᐃᑦ ᖃᐅᔨᔪᓐᓇᖁᑉᓗᒋᑦ ᓅᑲᑕᖃᑦᑕᓚᐅᖅᑐᑦ ᐃᓄᐃᑦ ᖃᓄᐃᑦᑐᒃᑰᖅᓯᒪᖕᒪᖓᑕ.

ᐋᖅᑭᐅᒪᓂᕆᔭᖓ ᐊᐅᔭᒃᑰᔪᖅ. ᓄᓇᒦᓐᓂᐅᔪᖅ ᐊᐅᓚᑕᐅᔪᖅ ᐃᓄᖕᓄᑦ ᖃᑕᙳᑎᒌᒃᑐᓄᑦ ᓇᓗᓇᐃᔭᐃᕙᒃᑐᑦ ᐳᓚᕋᖅᑎᓄᑦ ᓄᓇᕗᑉ ᖃᓄᐃᓐᓂᖓᓄᑦ. ᑐᒃᑑᑉ ᐊᒥᐊᓄᑦ ᓴᓇᓯᒪᔪᖅ ᑐᐱᖅ, ᓴᓇᔭᐅᓯᒪᔪᖅ ᐃᓕᖅᑯᓯᑐᖃᑎᒍᑦ, ᐆᒃᑑᑎᒃᓴᑦᑎᐊᕙᒃ ᓅᑲᑕᒡᓗᓂ ᐱᖁᑎᒋᔭᐅᖃᑦᑕᓚᐅᖅᑐᓄᑦ ᐃᓄᐃᑦ ᖃᐅᔨᒪᔭᐅᓂᕆᔭᖏᑦ ᓄᓇᕐᔪᐊᕐᒥ. ᐃᓄᐃᑦ ᓴᓇᖃᑦᑕᕐᓂᖏᑦ ᒫᓐᓇᐅᔪᒧᑦ ᐅᖅᑯᐊᓕᐅᕈᑕᐅᕙᒃᑐᓄᑦ ᐱᒻᒪᕆᐅᓂᖅᐹᖑᖃᑕᐅᔪᖅ ᐃᓅᓇᓱᐊᕐᓂᕆᕙᒃᑕᖏᓐᓄᑦ ᐊᔾᔨᐅᖏᑦᑐᐊᓘᖃᑦᑕᖅᑎᓪᓗᒍ ᐊᓯᔾᔨᕋᔪᒃᑑᑎᓪᓗᒍ ᐅᑭᐅᖅᑕᖅᑑᑉ ᐊᕙᑎᖓ.

ᐳᓚᕋᖅᑏᑦ ᑕᑯᔪᓐᓇᕐᒥᔪᑦ ᑐᒃᑑᑉ ᐊᒥᖓᓄᑦ ᓴᓇᓯᒪᔪᒥᒃ ᖃᔭᕐᒥ, ᐃᖏᕐᕋᔾᔪᑕᐅᖃᑦᑕᖅᑐᕕᓂᕐᓂ ᐃᓚᐅᖃᑕᐅᔪᖅ ᓴᓇᔭᐅᓚᐅᖅᓯᒪᔪᑦ ᒪᓕᒍᓐᓇᖁᑉᓗᒋᑦ ᐊᓯᔾᔨᖅᓯᒪᔪᓄᑦ ᓄᓇᒃᑯᑦ, ᐊᒻᒪᓗ ᓅᑲᑕᖕᓂᕆᕙᒃᑕᖏᑦ ᐆᒪᔪᑦ ᐃᓄᖕᓄᑦ ᑐᙵᕕᒋᔭᐅᖏᓐᓇᖅᑐᑦ ᓂᕿᒋᕙᒃᖢᒋᑦ ᐅᖅᑯᐊᕆᕙᒃᖢᖏᑦ. ᓄᓇᒥ ᐳᓚᕋᖅᑐᑦ ᑕᑯᔪᓐᓇᖃᑦᑕᕐᓂᐊᖅᑐᑦ ᓴᓇᕐᕈᑎᓂᒃ ᐱᙳᐊᕈᑏᓪᓗ ᐊᑐᖅᑕᐅᒐᔪᓚᐅᕐᒥᔪᑦ ᐃᓕᖅᑯᓯᑐᖃᑎᒍᑦ.

ᐃᓕᖅᑯᓯᑐᖃᑎᒍᑦ ᓄᓇᒦᓐᓂᐅᕙᒃᑐᖅ ᑕᑯᔭᒐᖃᕐᕕᑐᐃᓐᓇᖅ. ᓴᖅᑭᐅᒪᑎᑦᑎᓇᓱᒃᑐᖅ ᐃᓅᓯᕆᔭᐅᕙᓚᐅᖅᑐᓂ ᐊᒻᒪᓗ ᖃᐅᔨᓴᕈᑕᐅᓪᓗᓂ ᑎᑎᕋᖅᐸᓪᓕᐊᓂᐅᓪᓗᓂᓗ ᐃᓄᐃᑦ ᐃᑦᓴᕐᓂᑕᖏᓐᓂᒃ. ᓄᓇᒦᓐᓂᐅᔪᖅ ᑲᑎᕝᕕᐅᕙᖕᒥᔪᖅ ᓄᓇᓕᖕᒥᐅᑦ ᐱᙳᐊᕆᐊᖅᑐᕈᓐᓇᖁᑉᓗᒋᑦ ᐊᒻᒪᓗ ᓂᕆᕕᒡᔪᐊᕈᓐᓇᖁᑉᓗᒋᑦ.

ᐃᓕᖅᑯᓯᑐᖃᑎᒍᑦ ᓄᓇᒦᓐᓂᐅᔪᖅ ᐱᓕᕆᐊᖑᔪᖅ ᐱᓕᕆᐊᖑᓯᒪᔪᖅ ᐃᓄᖕᓄᑦ ᐃᓱᒫᓗᒃᓯᒪᔪᓄᑦ ᖃᒪᓂ’ᑐᐊᕐᒥ ᓴᐳᓐᓂᐊᕈᒪᓂᕐᒧᑦ ᐃᑦᓴᕐᓂᑕᖏᓐᓂᒃ ᑕᑯᕙᓪᓕᐊᑎᓪᓗᒋᑦ ᐃᓕᖅᑯᓯᑐᖃᑎᒍᑦ ᐊᓯᔾᔨᖅᐸᓪᓕᐊᔪᓂᒃ ᒫᓐᓇᐅᔪᖅ ᓄᓇᒥ ᐃᓅᓇᓱᐊᖃᑦᑕᓕᖅᑎᓪᓗᒋᑦ. ᖃᑦᖃᒥᐅᑦ: ᖃᒪᓂ’ᑐᐊᕐᒥ ᐃᑦᓴᕐᓂᑕᓕᕆᔨᒃᑯᑦ ᑲᑎᒪᔨᑦ ᐊᑐᓕᖅᑎᖅᑕᐅᓚᐅᖅᑐᑦ 1989-ᒥ. ᐸᐸᑦᑎᓇᓱᐊᖅᑎᐅᔪᑦ ᐃᑦᓴᕐᓂᑕᓂᒃ ᖃᑉᓯᑲᓪᓚᐅᔪᓂᒃ.

ᐅᖃᐅᓯᖅ “ᖃᑦᑕᒥᐅᑦ” ᐱᔾᔪᑎᖃᖅᑐᖅ ᐃᓄᖕᓂᒃ ᑕᐃᑉᓱᒪᓂᑐᖃᖅ, ᓄᓇᒥ ᑕᑉᒫᖃᑦᑕᓚᐅᖅᑐᓂᒃ ᖃᖅᑲᓂ ᑕᑯᔪᓐᓇᖃᑦᑕᖁᑉᓗᒋᑦ ᑐᒃᑐᓂᒃ, ᑭᒃᑯᑐᐃᓐᓇᕐᓂᒃ, ᐅᕝᕙᓘᓐᓃᑦ ᐊᓯᔾᔨᖅᐸᓪᓕᐊᔪᓂᒃ ᓯᓚᒃᑯᑦ. ᐅᖃᐅᓯᖅ ᑐᕌᖓᑦᑎᐊᖅᑐᖅ ᑲᑎᒪᔩᑦ ᑐᕌᒐᕆᔪᒪᔭᖏᓐᓄᑦ ᐸᐸᑦᑎᔪᒪᓂᕐᒧᑦ ᓄᓇᖓᑕ ᖃᓄᐃᓕᐅᕈᑎᒋᕙᓚᐅᖅᑕᖏᓐᓂᒃ ᐊᒻᒪᓗ ᐃᓄᐃᑦ ᐃᓕᖅᑯᓯᑐᖃᑎᒍᑦ ᐅᓂᑉᑳᖅᑐᐊᖏᓐᓂᒃ.

ᓄᓇᒦᓐᓂᐅᔪᖅ ᐃᓕᖅᑯᓯᑐᖃᑎᒍᑦ ᐋᖅᑭᒃᓱᖅᓯᒪᔪᖅ ᑮᓇᐅᔭᓕᖅᑐᖅᑕᐅᓯᒪᖃᑦᑕᖅᑐᖅ ᓄᓇᕗᑦ ᒐᕙᒪᒃᑯᖏᓐᓄᑦ, ᓇᖕᒥᓂᕆᔭᐅᔪᓄᑦ, ᑐᓂᓯᕙᒃᑐᓄᑦ, ᐊᒻᒪᓗ ᐊᑭᓕᖅᑐᖅᑕᐅᒐᑎᒃ ᐱᓕᕆᕙᒃᑐᓄᑦ ᐊᒥᓱᓄᑦ ᖃᒪᓂ’ᑐᐊᕐᒥᐅᑕᐅᔪᓄᑦ.

ᑕᐃᒪᑐᖅ ᐳᓚᕋᖅᑎᓪᓗᑎᑦ ᖁᕕᐊᓱᑦᑎᐊᕐᓂᐊᖅᐳᑎᑦ. ᐸᒡᕕᓵᕆᖁᔨᙱᑐᐃᓐᓇᖅᑐᒍᑦ ᐅᕝᕙᓘᓐᓃᑦ ᐊᒃᑕᑯᓂᒃ ᑕᒪᐅᖓᒥᐊᖅᓯᖁᔨᖏᑐᐃᓐᓇᖅᑐᒍᑦ, ᐃᒃᐱᒋᔭᐅᑦᑎᐊᖁᑉᓗᒍ ᓯᕗᓂᒃᓴᑦᑎᓐᓂ ᐳᓚᕋᖅᑏᑦ ᖁᕕᐊᒋᖃᑦᑕᕐᓂᐊᕐᒥᖕᒪᒍ.

ᑐᙵᓱᒋᑦ ᖃᒪᓂ’ᑐᐊᑉ ᐃᓕᖅᑯᓯᑐᖃᑎᒍᑦ ᐋᖅᑭᒃᓱᖅᓯᒪᔭᖓᓂ ᓄᓇᒥ. ᓄᓇ ᐊᑐᖅᑕᐅᔪᖅ ᐊᑐᐃᓐᓇᐅᕙᒃᑐᖅ ᐅᑉᓗᓗᒃᑖᒃᑯᑦ ᐊᐅᔭᐅᓕᕌᖓᑦ. ᑏᑕᖃᐃᓐᓇᓲᖅ. ᓄᓇ ᐅᐸᖕᓂᐊᕐᓗᒍ ᓇᓗᓇᐃᔭᕐᕕᐅᔪᒪᒍᕕᑦ ᓇᓃᒻᒪᖔᑦ, ᐊᑯᒪᓕᒃ ᐳᓚᕋᕐᕕᒃ ᑕᑯᒋᐊᕐᓗᒍ.