ᐅᑭᐊᒃᓵᒃᑯᑦ ᑐᒃᑐᓄᑦ ᐃᑳᕐᕕᐅᕙᒃᑐᖅ ᑲᓇᑕᒥ ᐃᑦᓴᕐᓂᑕᖃᕐᕕᒃ

ᐅᑭᐊᒃᓵᒃᑯᑦ ᑐᒃᑐᓄᑦ ᐃᑳᕐᕕᐅᕙᒃᑐᖅ ᑲᓇᑕᒥ ᐃᑦᓴᕐᓂᑕᖃᕐᕕᐅᔪᖅ ᐊᑯᑦᑐᐊᑉ ᑰᖓᑕ ᐊᑦᑎᖕᓂᖓᓃᑦᑐᖅ (ᕼᐊᕝᕙᖅᑑᖅ) ᐊᑯᓐᓂᖓᓂ ᐊᑯᑦᑐᐊᑉ ᖁᑉᓗᖅᑑᖓᑕ ᐊᒻᒪᓗ ᖁᑭᓪᕉᑉ ᓄᓇᕗᒥ. ᑕᒡᕙᓂ, ᑰᖓ ᐃᓂᖃᖅᑐᖅ ᐱᖓᖕᓇᖓᑕ ᑲᓇᖕᓇᖅᖠᖓᓂ, ᑐᐊᑦᑑᔪᖅ ᓯᑐᖅᑲᖓᓪᓗᓂ ᓯᒡᔭᖓ. ᓄᓇ ᓇᓗᓇᙱᓐᓂᐅᔪᖅ ᐅᑎᖅᑕᕐᕕᐅᖃᑦᑕᕐᓂᖓᓄᑦ ᑐᒃᑐᓄᑦ . ᑎᒃᑯᐊᖅᑕᐅᓯᒪᓂᖓ ᐱᔾᔪᑎᓕᒃ ᐃᓗᐃᑦᑐᒃᑯᑦ ᐃᓕᖅᑯᓯᑐᖃᑎᒍᑦ ᓄᓇᐅᓂᐅᖕᒪᑦ ᐊᑐᖅᑕᐅᔪᓐᓇᖅᑐᑦ ᑕᐃᒪᐅᓪᓗᑎᒃ.

ᐅᑭᐊᒃᓵᒃᑯᑦ ᑐᒃᑐᓄᑦ ᐃᑳᕐᕕᒃ ᑎᒃᑯᐊᖅᑕᐅᓚᐅᖅᑐᖅ ᑲᓇᑕᒥ ᐃᑦᓴᕐᓂᑕᖃᕐᕕᐅᖁᑉᓗᒍ 1995-ᒥ ᐃᒪᓐᓇᐃᒻᒪᑦ:
– ᐅᑭᐊᒃᓵᒃᑯᑦ ᑐᒃᑐᓄᑦ ᐃᑳᕐᕕᒃᑯᑦ ᐊᖑᓇᓱᒡᕕᒃ ᐊᑯᑦᑐᐊᕐᒥ ᑰᖕᒥ, ᓄᓇᒦᓐᓂᐅᖕᒪᑦ ᐅᕝᕙᓘᓐᓃᑦ ᑐᒃᑐᒐᓱᐊᕐᕕᐅᓪᓗᓂ, ᐃᓕᖅᑯᓯᑐᖃᑎᒍᑦ, ᐅᒃᐱᕐᓂᒃᑯᑦ ᐊᒻᒪᓗ ᑮᓇᐅᔾᔭᒃᓴᕐᓂᒃᑯᑦ ᐃᓄᖕᓄᑦ ᑭᕙᓪᓕᕐᒥᐅᓄᑦ, ᐊᒻᒪᓗ ᐱᒻᒪᕆᐅᑎᑕᐅᔪᖅ ᓄᓇᖓᓐᓄᑦ.

ᐃᑦᓴᕐᓂᑕᖃᕐᓂᖓ ᐅᑭᐊᒃᓵᒃᑯᑦ ᐃᑳᕐᕕᐅᕙᒃᑑᑉ ᑲᓇᑕᒥ ᐃᑦᓴᕐᓂᑕᖃᕐᕕᒃ ᑕᐃᒪᐃᑦᑐᖅ ᖃᐅᔨᔭᐅᖃᑦᑕᖅᓯᒪᓂᖓᓄᑦ ᐊᒥᓱᓂᒃ ᐅᑭᐅᓂᒃ ᓄᓇᒥ ᐃᓄᐃᑦ ᑐᒃᑐᓐᓇᓱᖃᑦᑕᖅᑎᓪᓗᒋᑦ ᐃᓕᖅᑯᑐᖃᑎᒍᑦ ᓄᓇᒥ, ᐊᑐᖅᑕᐅᒐᔪᖕᓂᖓᓗ ᑐᒃᑐᒐᓱᖕᓂᐅᕙᒃᑐᒃᑯᑦ, ᐅᖃᐅᓯᐅᓯᒪᓪᓗᓂᓗ ᐃᑦᓴᕐᓂᑕᒃᑯᑦ, ᐃᓕᖅᑯᓯᑐᖃᑎᒍᑦ ᐊᒻᒪᓗ ᐸᐸᑕᐅᔪᒃᑯᑦ ᐃᓄᖕᓄᑦ ᐊᑯᓂ ᐊᑐᖅᑕᐅᓯᒪᓕᕐᓂᖓᓄᑦ, ᐋᖅᑭᒃᓱᐃᓯᒪᓂᖏᓐᓄᓪᓗ ᖃᓄᐃᓕᐅᕈᑎᒃᓴᓂᒃ. ᐊᒥᓱᓂᒃ ᐅᑭᐅᓂᒃ, ᐅᑭᐊᒃᓵᒃᑯᑦ ᑐᒃᑐᑦ ᐃᑳᖃᑦᑕᕐᓂᖏᑦ ᐊᑯᑦᑐᐊᒃᑯᑦ ᑰᒃᑯᑦ ᓄᓇᒦᑦᑐᓅᖓᓂᖅᓴᐅᓪᓗᓂ, ᐃᓅᓇᓱᐊᕈᑎᒃᑯᑦ ᐱᕚᓪᓕᕈᑕᐅᕙᒃᖢᓂ ᐊᒻᒪᓗ ᐃᓅᕌᓂᒍᓐᓇᕐᓂᕐᒧᓪᓗ ᐅᑭᐅᒃᑯᑦ. ᐃᒪᕐᒦᓕᕌᖓᑕ, ᑐᒃᑐᑦ ᐱᔭᐅᔪᓐᓇᖅᓯᖃᑦᑕᓚᐅᕐᒪᑕ ᐊᖑᓇᓱᒃᑎᓄᑦ ᖃᔭᖅᑐᖅᑐᓄᑦ ᑐᒃᑐᑉᐸᒃᑐᓄᑦ ᐱᑎᒃᓯᒃᑯᑦ ᐱᔪᓐᓇᕐᓂᓗᒃᑖᒥᓄᑦ. ᐃᓄᐃᑦ ᐅᐱᒍᓱᒃᓯᒪᔪᒻᒪᕇᑦ ᑲᒪᑦᑎᐊᖃᑦᑕᖅᖢᑎᒡᓗ ᓄᓇᒥ ᐃᑳᕐᕕᐅᕙᒃᑐᓂ ᒪᓕᒃᖢᒋᑦ ᐃᓕᖅᑯᓯᑐᖃᑎᒍᑦ ᐅᒃᐱᕆᔭᐅᔪᑦ ᐊᒻᒪᓗ ᐊᑐᖅᑕᐅᕙᒃᑐᑦ ᑐᒃᑐᑦ ᐅᑎᖃᑦᑕᕈᓐᓇᖁᑉᓗᒋᑦ ᐊᕐᕌᒍᑕᒫᒃᑯᑦ ᓂᒋᐊᓄᙵᐅᓕᖅᑎᓪᓗᒋᑦ. ᓄᓇᒦᑦᑐᑦ ᐃᓄᖕᓄᑦ, ᑐᒃᑐᑦ ᐱᒻᒪᕆᐅᑎᑕᐅᔪᑦ ᐃᓅᓯᕐᒧᑦ. ᓱᓇᓗᒃᑖᖏᑦ ᐱᒻᒪᕆᐅᑎᑕᐅᓪᓗᑎᒃ ᓂᕿᒃᓴᐅᓂᖓᓄᑦ, ᐅᖁᖅᓴᕈᑕᐅᓂᖓᓄᑦ, ᓴᓇᕐᕈᑎᒃᓴᐅᓂᖓᓄᑦ, ᐊᓐᓄᕌᒃᓴᐅᓂᖓᓄᑦ ᐅᖅᑯᐊᒃᓴᐅᓂᖓᓄᓪᓗ.