ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᖅᓯᕐᕕᒃ

ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᖅᓯᕐᕕᒃ ᓂᒋᐊᓃᑦᑐᖅ ᓇᐅᔮᑦ ᐊᒻᒪᓗ ᐅᑭᐅᖅᑕᖅᑑᑉ ᐃᒪᖓᑕ ᐊᒻᒪᓗ ᑕᐅᕙᓃᑦᑐᖅ ᐅᒃᑯᓯᒃᓴᓕᖕᓂ, 100 ᑭᓛᒥᑕᒥᒃ ᑕᕆᐅᕐᒧᑦ ᐅᐊᖕᓇᖓᑕ ᑲᓇᖕᓇᖅᖠᖓᓄᑦ ᑕᓯᐅᔭᕐᔪᐊᑉ ᓄᓇᕗᒥ. ᒥᕐᖑᐃᖅᓯᕐᕕᒃ ᐅᐸᒃᑕᐅᔪᓐᓇᖃᑦᑕᖅᑐᖅ ᑎᖕᒥᓲᒃᑯᑦ ᕕᓂᐲᒃᒥ ᐅᕝᕙᓘᓐᓃᑦ ᔭᓗᓇᐃᕝᒥ ᑲᖏᖅᖠᓂᒃᑯᑦ, ᖃᒪᓂ’ᑐᐊᒃᑯᑦ ᐅᕝᕙᓘᓐᓃᑦ ᓇᐅᔮᒃᑯᑦ. ᐅᒃᑯᓯᒃᓴᓕᒃ ᒥᕐᖑᐃᖅᓯᕐᕕᒃ ᐊᖏᓂᓕᒃ 20,500 ᑭᓚᒥᑕᒥᒃ.

ᐅᒃᑯᓯᒃᓴᓖᓚᔭᐅᓲᖅ ᐅᒃᑯᓯᒃᓴᖃᕐᓂᖓᓄᑦ, ᒥᕐᖑᐃᖅᓯᕐᕕᒃ ᓴᐳᓐᓂᐊᖅᐸᒃᑐᖅ ᐱᒻᒪᕆᐅᔪᓂᒃ ᐃᓂᒋᔭᐅᕙᒃᑐᓂᒃ ᑐᒃᑐᓄᑦ, ᐅᒥᖕᒪᖕᓄᑦ, ᓇᓄᕐᓄᑦ, ᐊᒃᖤᓄᑦ, ᓇᒃᑐᕋᓕᖕᓄᑦ, ᐊᒻᒪᓗ ᐊᒥᓱᓄᑦ ᐅᑭᐅᖅᑕᖅᑐᒥ ᐆᒪᔪᕆᔭᐅᕙᒃᑐᓄᑦ. ᐅᒃᑯᓯᒃᓴᓕᐅᑉ ᓄᓇᖓ ᖃᖅᑲᓕᒃ, ᒪᕋᓕᖕᓂᒡᓗ, ᖃᐃᖅᑐᓂᒃ, ᐃᒪᕐᓂᒃ ᐊᒻᒪᓗ ᓯᒡᔭᓂᒃ ᐊᒻᒪᓗ ᓯᕗᓪᓕᖅᐹᖅ ᑲᓇᑕᒥ ᒥᕐᖑᐃᖅᓯᕐᕕᒃ ᐃᒪᖃᕐᕕᖃᑦᑎᐊᖅᖢᓂ. ᐅᒃᑯᓯᒃᓴᓕᒃ ᐱᒻᒪᕆᐅᑎᑕᐅᔪᖅ ᓄᓇᓕᖕᓂ ᐃᓄᖁᑎᒋᔭᐅᔪᓄᑦ ᐊᖑᓇᓱᒡᕕᐅᓂᖓᓄᑦ, ᐊᒻᒪᓗ ᐃᓕᖅᑯᓯᑐᖃᑎᒍᑦ ᐱᒻᒪᕆᐅᑎᑕᐅᓂᖓᓄᑦ. 500 ᐅᖓᑖᓃᑦᑐᑦ ᐃᑦᓴᕐᓂᑕᐃᑦ ᓄᓇᐃᑦ ᑕᐃᑲᓃᑦᑐᑦ ᒥᕐᖑᐃᖅᓯᕐᕕᖕᒥ.

ᒥᕐᖑᐃᖅᓯᕐᕕᖕᒥ ᖃᓄᐃᓕᐅᕈᓘᔭᕐᓇᖅᑐᖅ: ᓄᓇᒦᓐᓂᖅ, ᐱᓱᓗᖕᓂᖅ, ᐆᒪᔪᓂᒃ ᑕᐅᑐᖕᓂᖅ. ᐊᑐᓕᖁᔭᐅᒐᔪᒃᑐᖅ ᐳᓚᕋᖅᑐᑦ ᒥᕐᖑᐃᖅᓯᕐᑯᖕᒥ ᓄᓇᒧᙵᐅᔾᔨᔨᒥᒃ ᐱᓕᕆᔨᑖᖃᑦᑕᖁᑉᓗᒋᑦ ᒥᕐᖑᐃᖅᓯᕐᕕᓕᐊᕈᔾᔭᐅᓗᑎᒃ ᓇᓄᖃᓗᐊᕐᓂᖓᓄᑦ.

ᖃᒪᓂ’ᑐᐊᖅ ᓇᐅᔮᓪᓗ ᒥᕐᖑᐃᖅᓯᕐᕕᐅᑉ ᖃᓂᖓᓃᑦᑐᑦ. ᖃᐅᔨᒋᐊᕐᕕᐅᔪᓐᓇᖅᑐᖅ ᐱᕙᓪᓕᐊᔪᓕᕆᔨ ᖃᒪᓂ’ᑐᐊᑉ ᕼᐊᒻᓚᖓᓂ ᑐᑭᓯᒋᐊᒃᑲᓐᓂᕈᒪᒍᑉᓯ ᐊᒻᒪᓗ ᑐᓴᕈᒪᒍᑉᓯ ᑭᒃᑰᖕᒪᖔᑕ ᓚᐃᓴᓐᓯᓖᑦ ᓄᓇᒧᙵᐅᔾᔨᕙᒃᑐᑦ ᑭᕙᓪᓕᕐᒥ.