ᐊᑭᓚᓵᕐᔪᒃ ᐱᓱᒡᕕᒃ

ᐊᑭᓚᓵᕐᔪᒃ Prince river ᐹᖓᓃᑦᑐᖅ, ᐃᒻᒪᖄ 8 ᒪᐃᓕᒥᒃ ᐅᖓᓯᖕᓂᓕᒃ ᓄᓇᓕᐅᑉ ᐱᖓᖕᓇᖓᓄᑦ. ᓄᓇᖅᑲᑎᒌᖕᓄᑦ, Prince River ᐃᖃᓗᖕᓂᐊᕐᕕᐅᔪᖅ ᐊᒻᒪᓗ ᐱᙳᐊᕐᕕᐅᕙᒃᖢᓂ ᐅᐱᕐᖔᒃᑯᑦ ᐊᐅᔭᒃᑯᓪᓗ. ᑎᑭᑦᑐᓐᓇᖅᑐᓯ ᐅᒥᐊᒃᑯᑦ ᐊᐅᔭᒃᑯᑦ ᐅᕝᕙᓘᓐᓃᑦ ᓯᑭᑑᒃᑯᑦ, ᖃᒧᑎᒃᑯᑦ ᐊᒻᒪᓗ ᐅᒥᐊᒃᑯᑦ ᒪᐃᒥ ᔫᓐᒥᓘᓐᓃᑦ. ᐃᑦᓴᕐᓂᑕᐃᑦ ᖃᒪᓂ’ᑐᐊᕐᒥᐅᓄᑦ ᐃᓂᒋᔭᐅᖃᑦᑕᖅᓯᒪᓂᕕ (1700-1900 A.D.). ᑕᑯᓐᓇᖅᑐᒻᒪᕆᐊᓗᒃ ᖃᓄᐃᓕᐅᕈᓘᔭᕐᓇᖅᖢᓂᓗ (ᐳᐃᒍᖅᑕᐃᓕᒃᑭᑦ ᐃᖃᓗᒐᓱᒍᑎᑎᑦ!) ᐊᒻᒪᓗ ᓇᓗᓇᙱᑦᑐᖅ ᐅᑉᓗᕆᔭᐃᑦ ᖁᕕᐊᒋᓂᐊᖅᑕᐃᑦ.

ᓯᕐᓗᐊᖅ ᐃᓂᒋᔭᐅᔪᖅ

ᐱᓱᒋᐊᕐᓇᖅᑐᖅ ᑎᑎᕋᖅᓯᒪᔪᒥ ᐃᓄᒃᓱᖕᒥᓗ ᑲᓇᖕᓇᖓᓂ ᓯᒡᔭᐅᑉ ᑰᑉ ᐹᖓᓂ. ᑕᐃᑲᙵᑦ ᐱᓱᒡᓗᑎᑦ ᖃᓂᓐᓂᖅᐹᒧᑦ ᖃᐃᖅᑐᒧᑦ, ᐅᔭᖅᑲᓄᑦ ᓴᓇᓯᒪᔪᓕᒃ ᑮᔭᖃᑦᑕᒡᕕᕕᓃᑦ, ᐃᒐᕝᕕᐅᖃᑦᑕᖅᑐᕕᓂᕐᓗ ᐊᒻᒪᓗ ᓂᕿᓄᑦ ᐊᒥᕐᓄᑦ ᐃᓂᖃᕐᕕᕕᓂᖅ. ᑕᒪᓐᓇ ᓯᕐᓗᐊᖑᓂᕋᖅᑕᐅᔪᖅ, ᖃᐃᖅᑐᕐᒥ ᕿᑎᐊᓂ ᐃᓂᖓ. ᐊᐅᔭᒃᑯᑦ ᐊᑐᖅᑕᐅᖃᑦᑕᓚᐅᖅᑐᖅ ᒥᒃᑯᓄᑦ ᐃᓂᖃᕐᕕᐅᓪᓗᓂ ᐅᕝᕙᓘᓐᓃᑦ ᐃᖃᓗᖃᕐᕕᐅᓪᓗᓂ ᐃᓛᒌᑦ ᕿᒻᒥᕆᔭᐅᔪᓪᓗ ᓄᓇᒦᑎᓪᓗᒋᑦ ᐊᒻᒪᓗ ᐱᖁᑎᓕᔭᖅᖢᑎᒃ ᐃᖏᕐᕋᖃᑦᑕᖅᑎᓪᓗᒋᑦ. ᓯᕐᓗᐊᖅ ᐅᔭᖅᑲᓕᖅᑐᐃᕝᕕᐅᖃᑦᑕᖅᓯᒪᓂᑯ ᓂᕿᑦ ᐊᒃᑐᖅᑕᐅᔪᓐᓇᖏᖦᖢᑎᒃ ᓱᓇᓄᑦ ᐆᒪᔪᓄᑦ ᓂᕿᒃᓴᖅᓯᐅᖅᐸᒃᑐᓄᑦ, ᐊᐅᔭᐅᖃᑦᑕᕐᓂᐊᖅᖢᑎᒃ ᓂᕿᑦ ᐅᑭᐅᒃᑯᑦ ᐊᒻᒪᓗ ᑮᔭᖃᑦᑕᕐᕕᐊᖃᑦᑕᖅᖢᓂ, ᐊᓂᔪᓐᓇᐃᓪᓕᕙᒃᑐᓄᑦ. ᒥᑭᓂᖅᓴᑦ ᑮᔭᖃᑦᑕᒍᑏᑦ ᖃᐃᖅᑑᑉ ᖄᖓᓂ ᐊᑐᖅᑕᐅᖃᑦᑕᓚᐅᖅᑐᑦ ᐅᔭᖅᑲᒧᑦ ᑲᑕᒡᕕᐅᓪᓗᑎᒃ ᐃᑎᖅᑕᕐᕕᖓ ᐃᑎᖅᑕᕐᕕᐅᕈᓇᒍ.

ᐅᔾᔨᕈᓱᓕᖅᑐᑎᑦ ᓇᓗᓇᙱᑦᑐᖅ, ᖃᐃᖅᑑᑉ ᖃᖓᓃᖦᖢᓂ ᓄᓇ ᑕᐅᑐᒃᖢᒍ ᐱᐅᔪᒻᒪᕆᐊᓘᖕᒪᑦ. ᑰᒡᔪᐊᖅᑐᖅ ᐊᑖᓃᖦᖢᓂ ᐊᒻᒪᓗ ᐊᑭᓚᓵᕐᔪᒃ ᐊᑭᐊᓃᖦᖢᓂ. ᑕᑯᔪᓐᓇᖅᑕᐃᑦ ᓄᓇᕆᐊᖅ ᓂᒋᐊᓂ, ᐊᒻᒪᓗ ᐅᒃᐱᑐᔪᖅ ᕿᑭᖅᑕᖅ ᑕᑯᔪᓐᓇᖅᑕᒃᓴᕆᔭᐃᑦ ᑐᓄᐊᓂ ᓴᐅᒥᖅᖠᐊᓂ ᓄᓇᕆᐊᖅ. ᐅᒃᐱᑐᔪᖅ ᕿᑭᖅᑕᖅ ᓯᕗᓪᓕᖅᐹᖑᓚᐅᖅᓯᒪᔪᖅ ᓂᐅᕕᕐᕕᖃᕐᕕᒃ ᖃᒪᓂ’ᑐᐊᕐᒥ, ᓴᓇᔭᐅᓐᓂᑯ 1916-ᒥ.

ᐅᑉᓛᒃᑯᑦ, ᓄᕕᐱᕆ, 1810-ᒥ.

ᐃᓐᓇᐅᓕᖅᑐᖅ ᐊᖑᑎ ᖁᐊᖑᓕᖅᑐᒥ ᑎᕆᒐᓂᐊᕐᒥ ᐃᓕᓯᓪᓗᓂ ᖃᒧᑎᒥᓄᑦ. ᐃᓚᒥᓄᑦ ᐅᑎᕈᓂ ᐊᐅᒃᓯᕐᓗᒍ ᑎᕆᒐᓂᐊᖅ ᐃᒡᓘᑉ ᐃᓗᐊᓂ ᐊᒥᖓ ᐋᖅᑭᒃᓱᕐᓂᐊᕐᒪᒍ ᑭᐴᑎᒋᔪᒪᓗᒍ. ᐃᓚᓂᓗ ᕿᒻᒥᖃᖅᖢᑎᒃ ᒪᕐᕉᖕᓂᒃ ᐃᖏᕐᕋᕙᓪᓕᐊᔪᒫᓕᕐᒥᒐᒥᒃ ᑭᐴᑎᖃᕆᐊᖅᑐᕐᓗᑎᒃ ᑰᒡᒧᐊᕐᒧᑦ ᐅᐱᕐᖓᖅᐸᑦ ᐅᑉᓗᑦ ᑕᑭᓂᖅᓴᐅᓕᖅᐸᑕ. ᑕᐃᑯᙵ ᐅᑎᖅᑕᖃᑦᑕᖅᓯᒪᒐᒥ ᒪᒃᑯᒃᑑᓕᖅᖢᓂ ᑕᐃᑉᓱᒪᓂᑐᖃᖅ ᐱᒋᐊᖅᖢᒍ ᐊᒻᒪᓗ ᑭᐴᑎᖃᑦᑕᕐᓂᕐᒧᑦ ᐱᓕᕆᔾᔪᔾᔨᕙᒃᖢᓂ ᐃᓚᒥᓂᒃ ᐱᓕᕆᑎᓪᓗᒍ. ᑎᕆᒐᓂᐊᖃᑦᑎᐊᕈᒪᔪᖅ ᖁᑭᐅᑎᑖᕈᑎᒃᓴᓂᒃ ᐊᒻᒪᓗ ᒥᖅᑯᑎᑖᕈᑎᓗᓂᐅᒡᓘᓐᓃᑦ ᓄᓕᐊᓂ.

ᑯᕕᐊᖃᕐᕕᒃ ᓄᓇ

ᐱᓱᒃᐸᓪᓕᐊᓕᕐᒥᓗᑎᑦ ᖃᐃᖅᑐᒃᑲᓐᓂᕐᒧᑦ ᓂᒋᐊᓂ. ᖃᓂᖓᓂ (ᐅᐊᖕᓇᖓᓂ) ᖃᕐᒪᕕᓂᕐᒥ ᑕᑯᔪᓐᓇᖅᑐᑎᑦ. ᑕᐃᑉᓱᒪᓂᑐᖄᓗᒃ ᐃᓄᐃᑦ ᖃᒪᓂ’ᑐᐊᕐᒥᐅᑦ ᐊᒻᒪᓗ ᒫᓐᓇᐅᔪᖅ ᐃᓄᐃᑦ ᐃᓛᓐᓂᒃᑯᑦ ᑕᒪᒃᑯᓂᙵ ᐊᑐᖅᐸᒃᑐᑦ ᒥᑭᔪᓂᒃ ᐅᖅᑯᐊᕐᓂᒃ ᐅᔭᖅᑲᓄᑦ ᓴᓇᓯᒪᔪᓂᒃ, ᐊᐳᑎᒧᑦ ᓴᓇᓯᒪᔪᓂᒃ, ᐅᕝᕙᓘᓐᓃᑦ ᓯᑯᒥ ᓴᓇᓯᒪᔪᓂᒃ ᖁᓕᓕᖅᓯᒪᓪᓗᒋᑦ ᑐᐱᕐᒥ. ᖃᕐᒪᑦ ᐊᑐᖅᑕᐅᓂᖅᓴᐅᖃᑦᑕᖅᖢᑎᒃ ᐅᑭᐊᒃᓵᒃᑯᑦ ᐊᐳᑎ ᐃᒡᓗᓕᐅᕈᑕᐅᔪᓐᓇᖅᓯᕙᓪᓕᐊᓂᖓᓄᑦ. ᐊᖑᓇᓱᒃᑎᓘᓐᓃᑦ ᓯᓂᒐᔭᖅᑐᖅ ᑕᐃᒪᐃᑦᑐᒥ ᒥᑭᔪᒥ ᖁᓕᓕᖅᓯᒪᓗᒍ ᑐᒃᑐᑉ ᐊᒥᖓᓄᑦ ᑐᐱᓕᔭᙱᓪᓗᓂ ᐊᐅᓪᓚᖅᓯᒪᒃᐸᑦ ᕿᒪᐅᒪᓗᓂ ᐃᓚᒥᓂᒃ. ᓂᒋᐊᓂ ᖃᐃᖅᑑᑉ ᑯᕕᐊᖃᕐᕕᐅᔪᖅ, ᑭᑉᐹᕆᒃᑑᓪᓗᓂ ᒥᑭᔪᖅ ᐃᓗᑦᑐᖅᑎᖅᓯᒪᔪᖅ 1 ft-ᒥ ᓯᓕᖕᓂᖃᖅᑐᖅ. ᑐᒃᑑᑉ ᐊᒥᖓᓄᑦ ᓄᑖᒧᑦ ᐃᓕᓯᕝᕕᒋᖅᑳᕐᓗᒍ, ᐆᓇᖅᑐᒧᑦ ᑐᓐᓄᕐᒧᑦ ᐃᓕᓯᕝᕕᒋᓇᔭᖅᑐᖅ ᖁᐊᖅᑎᒍᓐᓇᖁᑉᓗᒍ. ᐃᒐᕝᕕᒃ ᖃᓂᑦᑑᓪᓗᓂ.

ᐅᓐᓄᒃᑯᑦ, ᔪᓚᐃ, 1898-ᒥ

ᐊᕐᓇᖅ ᓰᖅᑯᖓᔪᖅ ᐃᑯᐊᓛᖅᑑᑉ ᓴᓂᐊᓂ ᐃᖓᓪᓗᓂ. ᐃᒐᓯᒪᑦᑎᐊᓕᕐᒪᑕ ᑐᓕᒫᑦ ᓂᕿᓪᓗ ᕿᔪᖕᒧᑦ ᐋᓪᓕᕋᕐᒨᖅᖢᓂᒋᑦ ᓂᖕᓕᑦᓯᐊᕆᓪᓗᓂᒋᑦ. ᖃᑦᑕᖅ ᑯᕕᐊᖅᑲᕕᓕᐊᕈᑎᖕᒪᒍ ᖃᓂᑦᑑᔪᒧᑦ ᐃᓕᓯᕝᕕᒋᓪᓗᓂᐅᒃ ᑐᒃᑑᑉ ᐊᒥᖓᓂ ᓄᑖᒥ. ᐊᑐᖅᖢᓂ ᐅᒥᖕᒪᐅᑉ ᓇᒡᔪᖓᓄᑦ ᐊᑯᒍᑎᖃᖅᖢᒍ, ᐆᓇᖅᑐᖅ ᑐᓐᓄᖅ ᐃᓗᑦᑐᖅᑎᖅᓯᒪᔪᕐᒨᖅᖢᓂᐅᒃ. ᑐᓐᓄᖅ ᖁᐊᕐᒪᑦ, ᒥᒃᑯᑐᖅᖢᓂ ᓂᕆᖃᑕᐅᓕᖅᖢᒍ ᐅᕝᕙᓘᓐᓃᑦ ᐊᑐᕈᓐᓇᕐᓗᒍ ᖁᓪᓕᕐᒧᑦ ᐅᑭᐅᒃᑯᑦ. ᐱᐊᓂᖕᒪᑦ, ᓂᕆᖃᑎᒋᓕᖅᖢᓂᒋᑦ ᐃᓚᓂ.

ᓄᓇᒧᙵᐅᖅᑳᖅᑎᓐᓇᑎᑦ ᖃᒪᓂ’ᑐᐊᕐᒧᑦ, ᐃᖃᓗᒐᓱᖕᓂᐊᖅᐳᑎᑐᖅ ᑰᖕᒥ ᐅᕝᕙᓘᓐᓃᑦ ᑰᑉ ᐹᖓᓂ. ᐱᐊᓂᖅᐸᖅ ᒨᓐᒥ ᐅᕝᕙᓘᓐᓃᑦ ᔪᓚᐃ ᐱᒋᐊᓕᓵᖅᑎᓪᓗᒍ, ᑭᓯᐊᓂ ᖁᕕᐊᓇᒥᐊᕐᒥᔪᖅ ᖃᖓᑐᐃᓐᓇᑦᑎᐊᖅ ᐱᓇᓱᒋᐊᒃᓴᖅ!