ᐊᑯᑦᑐᐊᖅ ᐃᑦᓴᕐᓂᑕᖅ

ᐊᑯᑦᑐᐊᖅ ᑰᒃ ᑰᒃᐸᒃᑐᖅ ᑐᒃᑐ ᐃᓄᐃᑦ ᐃᓕᖅᑯᓯᑐᖃᓕᕆᔨᒃᑯᖏᑦᑎᒍᑦ, ᓄᓇᕗᒥ ᓄᓇᒦᓐᓂᐅᕙᒃᑐᒥ. ᐅᑭᐅᓂᒃ ᖄᖏᖅᓯᒪᔪᓂᒃ, ᐃᓄᐃᑦ ᓄᓇᒦᖃᑦᑕᖅᓯᒪᔪᒻᒪᕇᑦ ᐊᑯᑦᑐᐊᕐᒥ, ᓇᐹᖅᑐᖃᕐᓇᓂ ᐅᔭᕋᖃᓪᓚᕆᒃᖢᓂ. ᐊᑯᑦᑐᐊᑉ ᓯᒡᔭᖏᑦ ᓇᔪᖅᑕᐅᖃᑦᑕᖅᓯᒪᓂᖏᓐᓄᑦ ᓇᓗᓇᔮᖏᑦᑐᑦ, ᑕᐃᒪᐅᔪᓪᓗ ᐃᓄᒃᓱᐃᑦ ᑰᑉ ᐃᑳᕐᕕᖏᓐᓂ, ᓄᓇᒦᓐᓂᐅᔪᓂᒃ ᐊᒻᒪᓗ ᐱᕈᔭᕕᓂᕐᓂ. ᐊᑐᖅᑕᐅᖃᑦᑕᖅᓯᒪᓂᖏᑦ ᑕᐃᑉᓱᒪᓂᑐᖃᖅ ᑕᑯᔪᒥᓇᓪᓚᕆᒃᑐᑦ ᐳᓚᕋᖅᑎᓄᑦ.

ᐆᒪᔪᑦ ᑕᐃᒪᐅᖕᒪᑕ ᓅᑲᑕᒡᕕᐅᕙᒃᑐᓂ 500,000 ᖃᒪᓂᕐᔪᐊᖅ ᑐᒃᑐᖏᑦ – ᐊᒥᓲᓂᖅᐹᖑᖃᑕᐅᔪᑦ ᐆᒪᔪᑦ ᓅᑲᑕᖕᓂᕆᕙᒃᑕᖏᓐᓂᒃ ᓄᓇᕐᔪᐊᕐᒥ. ᐅᒥᖕᒪᖃᖃᑦᑕᕐᒥᔪᖅ, ᖃᕝᕕᖃᖃᑦᑕᖅᖢᓂᓗ ᐊᒻᒪᓗ 60 ᐊᔾᔨᒌᖏᑦᑑᑕᐅᔪᓪᓗ ᑎᖕᒥᐊᑦ. ᑭᒡᒐᕕᐊᕐᔪᐃᑦ ᐅᑉᓗᖃᖃᑦᑕᖅᑐᑦ ᑰᑉ ᓴᓂᐊᓂ, ᖃᖅᑲᖏᓐᓂ ᐊᑯᑦᑐᐊᑉ ᖁᕐᓗᖅᑑᖓᓂ, ᐊᒻᒪᓗ ᐃᒪᑦᑎᐊᕚᓗᒃ ᑰᖕᒥ ᐃᖃᓗᐃᓪᓗ, ᐃᖣᕋᐃᑦ ᓱᓗᐹᕈᐃᓪᓗ.