ᑭᙵᑦᑐᐊᖅ ᐊᒻᒪᓗ ᓯᐅᕋᖅᑕᕐᕕᒃ

ᖃᒪᓂ’ᑐᐊᖅ ᒪᕐᕉᖕᓂᒃ ᐃᑦᓴᕐᓂᑕᖃᕐᕕᖃᖅᑐᖅ ᐅᐸᒃᑕᐅᔪᓐᓇᖅᑐᑦ ᐊᑉᖁᑎᒃᑯᑦ ᐊᒻᒪᓗ ᐱᓱᒡᕕᐅᔪᓐᓇᕆᓪᓗᑎᒃ ᖃᒪᓂ’ᑐᐊᕐᒥᙶᕐᓗᓂ. ᑭᓇᑐᐃᓐᓇᖅ ᐱᕕᒃᓴᖃᖅᑐᖅ ᐊᑕᐅᓯᕐᒥ ᒪᕐᕉᖕᓂᒡᓘᓐᓃᑦ ᐃᑲᕐᕋᓂ ᑕᐃᑯᙵᐅᔪᓐᓇᖅᑐᑦ ᑖᑉᑯᓄᙵ ᐅᑎᕐᓇᖅᑐᓄᑦ ᑕᐃᑉᓱᒪᓂᑐᖃᕐᒧᑦ ᖃᐃᖅᑑᑉ ᖄᖓᓃᒻᒪᑕᓗ ᖃᒪᓂ’ᑐᐊᕐᒥ ᑕᑯᒋᐊᑦᑎᐊᕐᓈᓗᒃᖢᓂ ᐋᖅᑭᐅᒪᓂᕆᔭᖓᓂᒡᓗ. ᑭᙵᑦᑐᐊᖅ ᖃᓂᓐᓂᖅᓴᐅᔪᖅ (ᑕᑯᔪᒥᓇᕐᓂᖅᓴᐅᓪᓗᓂᓗ) ᐊᒻᒪᓗ ᑎᑭᑕᐅᔪᓐᓇᖅᑐᖅ ᐃᒻᒪᖄ 15 ᒥᓂᑦᒥᒃ ᕼᐊᒻᓚᒃᑯᑦ ᑎᑎᕋᕐᕕᖓᓂ. ᓯᐅᕋᖅᑕᕐᕕᒃ ᒥᑦᑕᕐᕕᐅᑉ ᐅᖓᑖᓃᑦᑐᖅ ᐸᐅᖓᖅᑕᕐᕕᐅᑉ ᖃᓂᖓᓂ, ᑕᑯᒃᓴᐅᓪᓗᓂ ᑕᐃᑲᙵᑦ ᖃᒪᓂ’ᑐᐊᑉ ᑰᖓ.

ᑭᙵᑦᑐᐊᖅ

ᑭᙵᑦᑐᐊᖅ ᖃᐃᖅᑑᑉ ᖄᖓᓃᑦᑐᖅ ᖃᐅᔨᒪᔭᐅᓪᓗᓂ ᐃᒪᓐᓇ M.O.T. ᖃᐃᖅᑐᖅ ᐅᕝᕙᓘᓐᓃᑦ “ᑭᙵᑦᑐᐊᖅ”. ᓯᓚᓕᕆᕝᕕᒃ, VHF ᓇᐅᒃᑰᕐᕕᒃᓴᓄᑦ ᓇᓂᓯᕝᕕᒃ, ᐊᒻᒪᓗ ᐊᕙᑉᓯᓛᕐᔪᐊᕌᓗᒃ ᑕᐃᑲᓃᒻᒥᔪᑦ ᖃᐃᖅᑐᒥ. ᑕᐃᑯᙵ ᐱᓱᒍᓐᓇᖅᑐᑎᑦ ᓄᑖᒥ ᕼᐊᒻᓚᒃᑯᑦ ᑎᑎᕋᕐᕕᖓᓂ. ᒪᓕᒡᓗᒍ ᐊᑉᖁᑎ ᐱᙳᐊᕐᕕᐅᑉ ᐱᖓᖕᓇᖓᓂ ᐊᒻᒪᓗ M.O.T. ᐃᒡᓗᖏᓐᓂ. ᖃᐃᖅᑐᖅ ᓴᐅᒥᖅᖠᕐᒦᓐᓂᐊᖅᑐᖅ, ᐊᒻᒪᓗ ᖁᓛᓄᙵᐅᓂᐊᕐᓗᓂ ᐊᑉᖁᑎᒃᑰᑐᐃᓐᓇᕐᕈᓐᓇᖅᑐᑎᑦ ᓴᐅᒥᖅᖠᐊᒍᑦ ᒪᔪᖅᑲᒃᑯᑦ ᐊᕙᑉᓯᓛᕐᔪᐊᕌᓗᒃ ᑐᕌᕐᕕᒋᓗᒍ.

ᐃᑦᓴᕐᓂᑕᐅᓂᖓᓄᑦ ᓇᓗᓇᐃᔭᐅᑎᑦ ᑐᐱᖃᕐᕕᕕᓃᑦ ᐊᖏᔪᑦ ᐅᔭᖅᑲᑦ. ᐃᑦᓴᕐᓂᑕᓕᕆᔨ ᖃᐅᔨᓴᐃᓚᐅᖅᑐᑦ ᑐᐱᕐᕕᕕᓂᕐᓂ ᑕᓪᓕᒪᓂᒃ 12-ᓂᒡᓗ 1958-ᒥ ᓴᓇᕐᕈᑎᕕᓂᕐᓂ ᓇᓂᓯᓚᐅᖅᑐᑦ ᐅᓗᒥ ᐊᐅᐸᓗᒃᑐᒥ ᑎᒍᒻᒥᕕᖃᖅᖢᒍ ᕿᒪᒃᑕᐅᔪᕕᓂᖅ ᑑᓕ ᐃᓄᖕᓄᑦ 400-800 ᐅᑭᐅᑦ ᐱᐊᓂᒃᓯᒪᓕᖅᑐᑦ ᑕᐃᑉᓱᒪᓂᑐᖄᓗᒃ. ᑑᓕ ᐱᕈᔭᖃᕐᕖᑦ ᑕᑯᒋᐊᕈᒥᓇᖅᑐᑦᑕᐅᖅ; ᐅᐱᒍᓱᖕᓂᐊᖅᑐᑎᑦ ᐊᖏᓂᖏᓐᓂᒃ ᐅᔭᖅᑲᑦ ᓴᓇᔭᐅᔾᔪᑎᒋᓚᐅᖅᑕᖏᓐᓂᒃ. ᓇᓄᐃᑦ ᐱᓇᓱᒃᑐᐊᓘᒋᐊᖃᕋᔭᖅᑐᑦ ᓂᕿᓅᕋᓱᖕᓂᐊᕈᑎᒃ. ᐱᕈᖅᓯᒪᔪᓂᒃ.

ᐅᑉᓗᒃᑯᑦ, ᔪᓚᐃ, 1498-ᒥ.

ᓯᓚ ᐅᖁᖅᑑᓪᓗᓂ; ᖃᐅᒪᔪᑯᓘᓐᓗᓂ. ᐊᓈᓇᐅᔪᖅ ᐊᒫᖅᑐᖅ ᓄᑕᕋᓛᕐᒥᓂ ᐱᓱᓗᒃᑐᖅ ᐅᑎᖅᑕᖅᖢᓂ ᖃᐃᖅᑑᑉ ᖄᖓᓂ, ᕿᒫᓇᓱᒃᑐᖅ ᕿᑦᑐᕆᐊᓂᒃ ᐊᒥᒐᙱᑦᑐᓂᒃ. ᓄᑕᕋᓛᖅ ᐊᒫᖅᑕᓂ ᑐᒃᑐ ᐊᒪᐅᑎᒧᑦ ᐅᖅᑰᔪᐊᓘᓪᓗᓂ ᕿᐊᖏᓐᓇᖅᑐᖅ. ᓄᖅᑲᖅᖢᓂ ᐃᑭᑦᑎᔪᖅ ᕿᔪᖕᓂ ᐃᖏᑦᑐᖅ ᐳᔪᖓᓂ, ᕿᑦᑐᕆᐊᖃᖏᔾᔪᑕᐅᖕᒪᑦ, ᓄᑕᕋᓛᒥᓂ ᐊᒪᐅᑎᒥᓂ ᐊᓂᑦᑎᔪᖅ.

ᑖᒻᓇ ᖃᐃᖅᑐᖅ ᐊᖏᕐᕋᕆᔭᐅᓚᐅᖅᑐᕐᓘᓐᓃᑦ ᐸᓕᐅ ᐃᓄᖕᓄᑦ ᖃᑕᙳᑎᒌᖕᓄᑦ ᑕᒫᓃᓚᐅᖅᓯᒪᔪᓄᑦ ᑕᐃᑉᓱᒪᓂᑐᖄᓗᒃ ᑑᓕ ᐃᓄᐃᑦ ᑎᑭᓚᐅᖅᑳᖅᑎᓐᓇᒋᑦ, ᐃᒻᒪᖄ 3000 ᐅᑭᐅᑦ ᑕᐃᑉᓱᒪᓂᑐᖃᖅ. ᑐᐱᕐᕕᕕᓂᖓ ᖃᐅᔨᓴᖅᑕᐅᓚᐅᖅᑐᑦ ᒪᕐᕉᖕᓄᑦ ᐃᑦᓴᕐᓂᑕᓕᕆᔨᓄᑦ 1955-ᒥ ᐊᒻᒪᓗ 1958-ᒥ, ᓄᓇᑐᐃᓐᓇᐅᓕᖅᑐᖅ ᑭᑉᐸᕆᒃᑐᑯᑖᒃ ᖃᐅᔨᓴᕐᕕᐅᓚᐅᖅᑐᖅ ᑕᐃᒪᑐᐊᖑᓪᓗᓂ ᐊᒻᒪᓗ ᐅᔭᖅᑲᑦ ᑲᑎᑕᐅᓯᒪᔪᑦ ᐅᐊᖕᓇᖅᐸᓯᖓᓂ #4. ᐃᑦᓴᕐᓂᑕᓕᕆᔩᑦ ᓇᓂᓯᓚᐅᖅᑐᑦ 11 x 20 ft ᑭᑉᐹᕆᒃᑐᑯᑖᒥ ᐅᔭᖅᑲᓂᒃ ᑐᐱᕐᕕᕕᓂᐅᔪᒥ ᐊᒥᕐᒥ, ᓄᓇᓕᖅᑐᖅᓯᒪᓚᐅᖅᑐᒃᓴᐅᔪᖅ. ᐃᒐᕝᕕᖓ ᕿᑎᐊᓃᑦᑐᕕᓂᖅ: ᐃᑭᑕᐅᖃᑦᑕᕐᓂᑯᖓ ᓇᓗᓇᖏᖦᖢᓂ ᓯᕐᔭᖃᕐᓂᕐᒧᑦ ᐅᔭᖅᑲᓪᓗ ᕿᕐᓂᖅᓯᓕᖅᓯᒪᓪᓗᑎᒃ ᐱᓚᐅᑎᕕᓃᓪᓗ ᐊᒻᒪᓗ ᐲᔭᐃᔾᔪᑏᑦ.

ᐸᓕᐅ ᐃᓄᐃᑦ ᖃᐅᔨᓴᖅᑕᐅᕝᕕᐅᓚᐅᖅᑐᒥ ᓂᑯᕕᖓᓪᓗᓂ, ᑕᑯᔪᓐᓇᖅᑐᑎᑦ 3000 ᐅᑭᐅᑦ ᑕᐃᑉᓱᒪᓂᑐᖃᖅ ᐸᓕᐅ ᐃᓄᐃᑦ ᐊᖏᕐᕋᕆᓚᐅᖅᑕᖓᓂ ᓯᒡᔭᒥ ᐱᑐᖃᒻᒪᕆᐊᓗᖕᒥ, ᐃᒪᖅ ᐅᖓᑕᐅᔾᔨᓯᒪᓚᐅᖅᑎᓪᓗᒍ ᒪᓐᓇᐅᔪᖅ ᓄᓇᒋᔭᐅᓕᖅᑐᒥ. 500 ᐅᑭᐅᑦ ᐱᐊᓂᒃᓯᒪᓕᖅᑐᑦ ᑐᓕ ᐃᓄᐃᑦ ᓄᓇᖃᖃᑦᑕᓚᐅᖅᑐᑦ ᖃᐃᖅᑐᒥ ᐊᐅᔭᒃᑯᑦ ᐊᓄᕆᖃᕐᓂᖅᓴᐅᔪᒃᑯᑦ ᐃᓂᖃᕈᓐᓇᕈᒪᓪᓗᑎᒃ. ᐅᑉᓗᒥ ᓄᓇᓕᒃ ᑕᑯᔪᓐᓇᖅᓯᔭᐃᑦ, ᐊᑉᖁᑏᑦ, ᐊᒻᒪᓗ ᐅᑉᓗᒥᐅᓕᖅᑐᖅ ᐊᑐᖅᑕᐅᕙᓕᖅᑐᑦ. ᐃᓕᑦᑎᔪᓐᓇᖅᑐᓗᒃᑖᖑᔪᒍᑦ ᑕᒡᕙᓂ ᐃᑦᓴᕐᓂᑕᖃᕐᕕᖕᒥ. ᐃᑦᓴᕐᓂᑕᕕᓃᑦ ᓱᕈᖅᑕᐅᔪᓐᓇᕐᒪᑕ ᑲᒪᑦᑎᐊᖏᓐᓂᒃᑯᑦ ᐃᓱᒪᙱᓐᓂᒃᑯᑦ: ᐊᑉᖁᑎ ᓴᓇᔭᐅᖕᒪᑦ ᖃᐃᖅᑐᒃᑯᑦ, ᑐᐱᕐᕕᕕᓃᑦ ᓅᑲᑕᒃᑕᐅᒥᐊᓚᐅᕐᓂᖅᖢᑎᒃ. ᓱᕈᖅᑕᐅᔭᕌᖓᑕ ᑕᒪᒃᑯᐊ ᐃᓇᖏᖅᑕᐅᒃᑲᓐᓂᕈᓐᓇᖏᑦᑐᑦ ᑕᒪᒃᑯᐊ ᐃᑦᓴᕐᓂᑕᒻᒪᕆᐊᓗᐃᑦ.

ᓯᐅᕋᖅᑕᕐᕕᒃ

ᑖᒻᓇ ᓯᐅᕋᖅᑕᕐᕕᒃ ᖃᐃᖅᑑᑉ ᖄᖓᓃᑦᑐᖅ ᒥᑦᑕᕐᕕᙶᖅᑐᒥ (A) ᖄᖓᓂᕐᓚᒃ ᐸᐅᕐᖓᖅᑕᕐᕕᐅᑉ (B). ᐊᖁᑦᑐᓐᓇᖅᑐᑎᑦ ᑕᐃᑯᙵ ᑖᒃᓯᒃᑯᑦ ᐅᕝᕙᓘᓐᓃᑦ ᕼᐊᓐᑕᒃᑯᑦ, ᐅᕝᕙᓘᓐᓃᑦ ᐱᓱᖕᓇᖅᑐᖅ ᖁᓕᓂᒃ ᑭᓛᒥᑕᓂᒃ ᓄᓇᒥᙶᕐᓗᓂ. ᒥᑦᑕᕐᕕᖕᒧᑦ ᖃᓂᓪᓕᒋᐊᕈᕕᑦ ᐊᑉᖁᑎᒃᑯᑦ, ᑕᓕᖅᐱᒃᑯᑦ ᓴᖑᓗᑎᑦ ᐊᑉᖁᑎᓕᐅᖅᑕᐅᓯᒪᔪᒧᑦ ᖃᐃᖅᑐᒃᑰᕐᓇᕐᒪᑦ ᒥᑦᑕᕐᕕᖕᒥ ᐊᒻᒪᓗ ᓯᐅᕋᖅᑕᕐᕕᖕᒧᑦ (ᐃᓄᐃᑦ ᐃᑳᕆᐊᖃᙱᑦᑐᑦ ᒥᑦᑕᕐᕕᖕᒥ ᑎᑭᑦᑐᒪᒍᑎᒃ ᐸᐅᕐᖓᖅᑕᕐᕕᖕᒧᑦ). ᖄᖏᕈᖕᓂ ᓯᐅᕋᖅᑕᕐᕕᒃ (G), ᕼᐊᓐᑕᒃᑰᕐᓇᖅᑐᖅ ᐊᑐᕐᓗᒍ ᖃᐃᖅᑑᑉ ᖃᓂᖓᓂ. ᐃᓂᖓ (X) 15 ᒦᑕᒥᒃ ᐅᖓᓯᖕᓂᓕᒃ ᓴᐅᒥᖅᖠᐊᓂ ᐱᓱᒡᕕᐅᑉ ᐊᒻᒪᓗ ᑎᑎᖅᑲᓕᒃ ᐊᒻᒪᓗ ᐊᒃᑕᕐᕕᖕᒥ ᓂᕆᔭᖅᑐᖅᐸᒃᑐᓄᑦ ᐊᑐᖅᑕᐅᔪᒃᓴᐅᓪᓗᓂ ᐊᒃᑕᕐᕕᒃ.

ᑕᒡᕙᓂ ᑕᑯᔪᓐᓇᖅᑐᑎᑦ ᓯᑕᒪᓂᒃ ᑐᐱᕐᕕᐅᔪᓂᒃ ᐊᑖᓃᑦᑐᑦ ᐅᔭᖅᑲᑦ ᓯᑐᖅᑲᐅᑉ. ᑐᓕᓄᑦ ᐃᓂᖃᕐᕕᐅᖃᑦᑕᕋᓱᒋᔭᐅᓯᒪᔪᖅ (400-800 ᐅᑭᐅᑦ ᐱᐊᓂᒃᓯᒪᓕᖅᑐᑦ) ᐅᔭᖅᑳᓘᖕᒪᑕ ᑲᑎᑕᐅᓯᒪᔪᑦ ᑐᐱᕐᕕᕕᓂᓕᐊᖑᓯᒪᔪᕕᓃᑦ. ᐃᓄᐃᑦ ᑐᐱᖃᓚᐅᖅᓯᒪᔪᑦ ᑖᑉᑯᓂᙵ ᑕᒡᕙᓃᖃᑦᑕᖅᑐᕕᓃᑦ ᑲᔾᔮᕐᓇᕐᓂᖓᓄᑦ ᓇᓗᓇᙱᑦᑐᖅ: ᑕᑯᔪᓐᓇᕋᔭᖅᖢᑎᒡᓗ ᑐᒃᑐᓂᒃ ᑰᑉ ᐹᖓᓂ, ᓯᒡᔭᒥ, ᐅᕝᕙᓘᓐᓃᑦ ᖃᐃᖅᑐᓂ ᖃᓂᖓᓃᑦᑐᓂᒃ. ᐊᑐᖃᑦᑕᖅᑐᕕᓃᖅᑲᐃ ᐸᐅᕐᖓᖅᑕᕐᕕᖕᒥ ᑕᑯᒋᐊᕐᕕᐅᖁᑉᓗᒍ ᓄᓇᒧᑦᑕᐅᖅ. ᐱᓱᒃᑲᓐᓂᕈᓐᓇᕈᕕᑦ ᐅᖓᓯᖕᓂᖅᓴᒧᑦ, ᑕᑯᔪᒪᓇᔭᕐᒥᔭᐃᑦ ᐸᐅᕐᖓᖅᑕᕐᕕᐅᑉ ᖄᖓ.