ᑰᑉ ᐹᖓᓂ ᐱᓱᒡᕕᒃ

ᓄᓇᖅᑲᑎᒌᖕᓄᑦ ᐃᓄᖕᓄᑦ ᖃᒪᓂ’ᑐᐊᑉ ᑰᖓ ᑕᐃᔭᐅᑐᐃᓐᓇᓲᖅ ᐃᒪᓐᓇ “ᑰᒃ”, ᑰᑉ ᐹᖓᓗ ᑕᐃᒪᐅᓪᓗᓂ ᐹᖓ. ᐊᖑᓇᓱᖃᑦᑕᓚᐅᖅᑐᑦ ᑕᐃᓱᒪᓂᑐᖄᓗᒃ ᑐᒃᑐᖃᑦᑕᓚᐅᕐᒪᑕ ᐊᒥᓱᓂᒃ ᐅᑭᐊᒃᓵᒃᑯᑦ ᑰᑉ ᐃᑳᕐᕕᖓᓂ ᐱᑎᒃᓯᒃᑯᑦ ᖃᔭᖅᑐᖅᓗᑎᒃ. ᒪᕐᕉᒃ ᐃᓂᒋᔭᐅᒧᑦ ᑕᒡᕙᓂ ᐱᓱᒡᕕᖕᒥ ᐊᖏᕐᕋᕆᔭᐅᔪᒃᓴᐅᔪᑦ ᐊᒥᓱᓄᑦ ᑐᒃᑐᖃᑦᑕᖅᓯᒪᔪᓄᑦ ᐅᑭᐊᒃᓵᒃᑯᑦ ᐊᒻᒪᓗ ᓄᓇᒦᖃᑦᑕᖅᑐᒃᓴᐅᔪᑦ ᖃᓂᖏᓐᓂ ᐱᕈᔭᐃᑦ ᐅᑭᐅᒃᑯᑦ.

ᑎᑭᑦᑐᓐᓇᕐᒥᔭᓯ ᐱᓱᒡᕖᑦ ᑰᒃᑯᑦ ᐅᒥᐊᒃᑯᑦ. ᐱᓱᒍᓐᓇᕐᒥᔪᑦ ᐱᓱᒡᕕᖕᒧᑦ ᖃᒪᓂ’ᑐᐊᕐᒥᙶᕐᓗᓂ ᑭᓯᐊᓂ ᑕᐃᒪᐃᖁᔭᐅᓗᐊᖃᑦᑕᙱᑦᑐᑦ ᑭᓯᒥ ᐱᔪᒪᓪᓚᕆᒃᐸᒃᑐᓄᑦ (ᐅᑎᒧᑦ ᖁᓕᓂᒃ ᑭᓛᒥᑕᓂᒃ ᐅᖓᓯᖕᓂᓕᒃ ᒥᑦᑕᕐᕕᖕᒥ ᐱᓱᒡᕕᖕᒧᑦ). ᐳᓚᕋᖅᑏᑦ ᖃᐅᔨᒪᔭᕆᐊᓖᑦ ᓂᕐᓗ’ᓈᖅ ᓴᖅᑭᑉᐸᖕᒪᑦ ᑭᓯᒥ ᐊᐳᑎᖃᕈᓐᓃᖅᑐᒃᑯᑦ ᔪᓚᐃ ᐱᒋᐊᕐᓂᖓᓂ.

ᐱᓱᒋᐊᕐᓗᑎᑦ ᐱᓱᒡᕕᐅᑉ ᐱᒋᐊᕐᓂᖓᓂ ᑎᑎᖅᑲᖃᕐᕕᐅᔪᒥ ᐊᒻᒪᓗ ᐃᓄᒃᓱᖃᕐᕕᐅᔪᒥ ᓯᒡᔭᖓᑕ ᖃᓂᖓᓂ. ᐱᓱᒃᐸᓪᓕᐊᑎᓪᓗᑎᑦ ᑐᒡᓕᐊᓄᑦ ᐃᓄᒃᓱᖕᒧᑦ ᑕᑯᔪᓐᓇᕐᓂᐊᖅᑐᓂᑦ ᐊᖏᔫᖏᑦᑐᒥᒃ ᐱᕈᔭᕐᒥ, ᓄᑕᐅᖏᓗᐊᖏᑦᑐᖅ, ᐃᓄᒃᓲᑉ ᑐᓄᐊᓂ . ᐊᖑᓇᓱᒃᑎᐅᔪᖅ ᕿᒪᐃᓚᐅᖅᓯᒪᔪᖅ ᐊᖑᓇᓱᒃᑎᓪᓚᕆᐅᓚᐅᖏᑦᑐᒃᓴᐅᔪᖅ – ᐱᕈᐃᓯᒪᓚᐅᕐᓂᕐᒪᕐ ᖃᖅᑲᐅᑉ ᓵᖓᓂ ᐊᒻᒪᓗ ᐅᑎᕐᕕᒋᓪᓗᓂᐅᒃ ᐅᑭᐅᒃᑯᑦ ᖃᒧᑎᒃᑯᑦ ᐊᐳᑕᐅᑉ ᐊᑖᓃᖦᖢᓂ. ᑐᕌᖅᐸᓪᓕᐊᓂᕐᓇᖅᑐᖅ ᑲᓇᖕᓇᖓᓄᑦ ᐊᒻᒪᓗ ᓯᑐᓐᓂᐅᓪᓗᓂ ᓯᒡᔭᒥ ᓄᓇ #2, ᐊᑕᐅᓯᖅ ᑐᐱᕐᕕᕕᓂᖅ. ᐅᔭᖅᑲᑦ ᐊᒻᒪᓗ ᐱᕈᖅᑐᑦ ᕿᑎᐊᓂᕐᓚᒃ ᓇᓗᓇᐃᔭᐅᑕᐅᔪᒃᓴᐅᔪᑦ ᕿᑎᐊᓄᑦ ᐃᑳᕐᕕᐅᖃᑦᑕᕐᓂᖓᓄᑦ ᕿᑎᐊᓃᑦᑐᖅ ᑐᐱᕐᕕᐅᑉ. ᓯᒡᔭᖓ 3000 ᐅᑭᐅᑦ ᐱᐊᓂᒃᓯᒪᓕᖅᑐᑦ ᑐᐱᐅᑉ ᐃᓂᒋᔭᖓᓃᓐᓇᔭᓚᐅᖅᑐᖅ ᑕᐃᔭᐅᓕᖅᖢᓂ “ᓯᒡᔭᒥ”.

ᐱᓱᓕᕐᓗᑎᑦ ᐃᓄᒃᓱᖕᒧᑦ ᑎᑎᕋᖅᓯᒪᔪᒧᓪᓗ ᐊᑎᑦᑎᐊᖓᓂ ᖃᐃᖅᑑᑉ ᖄᖓᓄᑦ (“ᓂᕐᓗᓈᖅ”: ᖃᐃᖅᑑᑉ ᐊᑎᖓ). ᐅᔭᖅᑲᑦ ᑕᓪᓕᒪᓄᖅᑲᐃ ᐊᖏᕐᕋᕆᔭᐅᓚᐅᖅᑐᓄᑦ #3. ᑐᓕᒥᐅᑦ ᐅᑭᐅᒃᑯᑦ ᐊᖏᕐᕋᖏᑦ ᖁᓕᓕᖅᑐᖅᓯᒪᒧᑦ ᕿᓇᓗᒐᐃᑦ ᓴᐅᓂᖏᓐᓄᑦ ᖃᐅᔨᒪᔭᐅᑦᑎᐊᖅᑐᑦ ᑕᕆᐅᕐᒥᐅᑕᐅᔪᓄᑦ ᐅᑭᐅᖅᑕᖅᑐᒥ ᑭᓯᐊᓂ ᑕᑯᓐᓇᓗᐊᖏᑦᑐᑦ ᓄᓇᒥ; ᐊᒥᕐᓄᑦ ᖁᓕᓕᖅᑐᖅᓯᒪᓚᐅᖅᑐᒃᓴᐅᔪᑦ ᓇᒡᔪᖕᓄᑦ ᐅᕝᕙᓘᓐᓃᑦ ᕿᔪᖕᓄᑦ. ᓇᑎᖓ ᑕᑯᒃᓴᐅᔪᖅ ᑑᓕ ᐃᒡᓗᖏᑦᑕ; ᐃᓗᑦᑐᖅᑎᖅᓯᒪᓪᓗᑎᒃ ᖃᑉᓯᓂᑭᐊᖅ ᐃᑎᒐᓂᒃ ᓄᓇᒧᑦ ᐊᒻᒪᓗ ᐃᑎᕐᕕᖓ ᐃᓗᑦᑐᖅᑎᖅᓯᒪᓪᓗᓂ ᐅᖁᕐᓂᖅᓴᐅᔪᓐᓇᖁᑉᓗᒍ ᐃᒡᓗ. ᖁᑦᑎᖕᓂᖅᓴᐅᓪᓗᓂ ᑐᓄᐊᓂ ᐃᒡᓘᑉ ᐅᖁᕈᑕᐅᔪᖅ ᓴᓇᐅᓱᖕᓇᖅᖢᓂᓗ ᐃᒡᓕᖏᑦ ᐃᓕᐅᖅᑲᐃᕝᕕᐅᓯᒪᔪᑦ ᓄᓇᒧᑦ ᐊᒻᒪᓗ ᑐᒃᑐᑦ ᐊᒥᖏᓐᓄᑦ. ᖁᓪᓕᖅ ᐅᒃᑯᓯᒃᓴᖅ, ᓂᕿᑦ ᐊᒻᒪᓗ ᐃᒐᔾᔪᑏᑦ ᐃᓂᖃᕋᔭᕐᒥᔪᑦ ᓯᕗᓂᐊᓂ. ᐃᒻᒪᖄ ᐊᑐᖅᑕᐅᖃᑦᑕᓚᐅᖅᑐᑦ ᐅᑭᐊᒃᓵᒃᑯᑦ ᐊᒻᒪᓗ ᐅᑭᐅᖅᐸᓪᓕᐊᓕᓵᖅᑎᓪᓗᒍ; ᖃᕐᒪᐅᓂᕋᖅᑕᐅᖃᑦᑕᖅᑐᑦ. ᑕᒪᓐᓇ ᐃᓂᒃᓴᑦᑎᐊᕙᒃ ᐱᔾᔪᑎᖃᕈᓘᔭᖅᖢᑎᒃ; ᖃᐃᖅᑑᑉ ᖄᖓᓂ ᑕᑯᓇᓱᖕᓇᕐᒪᑦ ᑐᒃᑐᓂᒃ, ᑲᔪᖅᑐᓂ ᖄᓕᖅᑐᖅᓯᒪᔪᑦ ᐊᖏᕐᕋᕆᔭᐅᔪᑦ ᑕᑯᔭᐅᔪᓐᓇᕋᔭᙱᑦᑐᑦ , ᐃᒪᖅ ᖃᓂᑦᑑᓪᓗᓂ ᑕᓯᐊᓚᕐᒥ ᖃᐃᖅᑑᑉ ᐅᖓᑖᓂ, ᐊᒻᒪᓗ ᐅᖅᑯᐊᓕᐅᑦᑎᐊᖅᓯᒪᔪᑦ ᐊᓄᕆᐊᓘᖃᑦᑕᕐᓂᖓᓄᑦ.

ᐅᓐᓄᓕᖅᑎᓪᓗᒍ, ᐊᒃᑐᐸᕆᐅᑉ ᐱᒋᐊᕐᓂᖓᓂ, 1602 A.D.-ᒥ

ᐊᕐᓇᖅ ᐃᒃᓯᕙᔪᖅ ᐃᒡᓕᕐᒥ ᑐᒃᑐᒥ ᔭᐸᓕᐅᖅᖢᓂ. ᓄᑕᕋᕐᒥ ᓯᓂᒃᑐᖃᖅᖢᓂ ᓴᓂᐊᓂ. ᐊᒥᓕᕆᓯᒪᓕᐊᓂᒃᖢᓂ ᐊᒻᒪᓗ ᐆᒃᑐᖅᓯᒪᓕᐊᓂᒃᖢᓂᐅᒃ ᐅᓗᒧᑦ. ᒥᖅᓱᖅᐸᓪᓕᐊᓕᖅᖢᒍ ᐸᕐᓇᒃᖢᒍ. ᑖᖅᑐᒻᒪᕆᐊᓘᓪᓗᓂ ᖁᓪᓕᕐᒧᑦ ᐃᑯᒪᑐᐃᓐᓇᕐᒪᑦ ᑲᔪᓯᑐᐃᓐᓇᖅᖢᓂ. ᖃᑕᙳᑎᒌᑦ ᐊᓐᓄᕌᖃᑦᑎᐊᕆᐊᖃᕐᒪᑕ ᐅᑭᐅᒥ ᐱᐊᓂᒃᓯᒪᔭᕆᐊᖃᖅᖢᓂ ᐊᐅᓪᓚᕆᐊᖅᑳᖅᑎᓐᓇᒋᑦ.

ᑕᓯᕋᖅ #4 ᓴᓂᐊᓃᑦᑐᖅ ᖃᐃᖅᑑᑉ ᑐᓄᐊᓂ. ᒫᓐᓇᐅᔪᖅ ᐃᓂᖓ ᐃᓂᒋᔭᐅᓚᐅᖅᑐᒃᓴᐅᔪᖅ 3000 ᐅᑭᐅᑦ ᐱᐊᓂᒃᓯᒪᓕᖅᑐᑦ; ᐱᓗᐊᖅᑐᒥ, ᑐᐱᕐᕖᑦ H6 ᐊᒻᒪᓗ ᕼ7 ᓄᑕᐅᖏᑦᑐᒥᓇᖅᑐᐊᓗᐃᑦ.

ᑕᓪᓕᒪᐅᔪᑦ ᐊᖏᔪᑦ ᑐᐱᕐᕖᑦ ᕼ1-ᒥ ᕼ5-ᒧᑦ ᐊᔾᔨᒌᖏᑦᑑᑕᐅᔪᑦ ᐋᖅᑭᐅᒪᓂᖏᑦ: ᐅᔭᖅᑲᑦ ᐊᕙᓗᒋᔭᐅᔪᑦ ᑕᑭᓂᖅᓴᒃᑯᑦ ᐊᒻᒪᓗᖅᓯᓯᒪᔪᑦ, ᐃᒐᕝᕕᖃᖅᖢᓂ ᐊᒻᒪᓗ ᓴᓚᐅᓱᒡᕕᒃ ᕿᑎᐊᓂ ᐊᒻᒪᓗ ᓯᓂᒡᕕᒃᑕᖃᖅᖢᓂ ᑕᒪᐃᓐᓄᑦ ᓴᓂᐊᖑᑦ. ᐃᒐᕝᕕᐅᖃᑦᑕᖅᓯᒪᔪᓪᓗ ᐅᑉᓗᑕᒫᒃᑯᑦ ᐱᕈᕐᕕᐅᓯᒪᓪᓚᕆᒃᑐᑦ ᕿᑎᕈᔪᐊᓂ. ᓯᓂᒡᕕᕕᓃᑦ ᓴᓂᕋᖓᓂ ᐊᒥᕐᓄᑦ ᐃᓕᓯᓯᒪᕝᕕᐅᓇᔭᓚᐅᖅᑐᑦ ᐊᒻᒪᓗ ᐱᕈᕐᕕᐅᓯᒪᕐᓚᒃᑐᑦᑕᐅᖅ; ᓴᓂᓕᕇᒃᑐᓪᓘᓇᔭᖅᑐᒃᓴᐅᔪᑦ ᒥᑭᔪᑦ ᐅᔭᖅᑲᑦ ᓇᓗᓇᐃᔭᐅᑕᐅᔪᑦ ᐃᒡᓕᐅᑉ ᑭᒡᓕᖓᓄᑦ.

ᐅᑉᓗᒃᑯᑦ, ᓄᕕᐱᕆ, 1327 BC-ᒥ.

ᒪᕐᕉᒃ ᐊᖑᑏᒃ ᓇᖕᒪᒃᑑᒃ ᖃᔭᕐᒥ ᓯᒡᔭᒥᙶᖅᖢᑎᒃ ᒪᔪᕋᖅᐸᓪᓕᐊᔫᒃ. ᑰᒃ ᖁᐊᖅᓯᒪᓪᓗᓂ ᐊᒻᒪᓗ ᖃᔭᐅᑉ ᐊᒥᖓ ᐲᖅᑕᐅᔭᕆᐊᖃᕐᒪᑦ ᐊᒻᒪᓗ ᑐᖅᑯᑦᑎᐊᕐᓗᒍ ᐅᑭᐅᒧᑦ. ᐊᒃᑲᖓ ᑕᓪᓕᒪᐅᔪᓂᒃ ᐃᓚᒌᖕᓂᒃ ᑰᒃᑰᕈᔾᔨᓯᒪᔪᖅ ᐅᐱᕐᖔᖑᓚᐅᖅᑐᒥ ᑰᖕᒧᑦ ᓇᐹᖅᑐᖃᖅᑐᒧᑦ. ᐃᑲᔪᓗᒃᑖᖅᓯᒪᓪᓗᑎᒃ ᖃᔭᓕᐅᕐᓂᕐᒧᑦ ᐊᒻᒪᓗ ᓇᒃᓴᖅᖢᑎᒃ ᕿᔪᖕᓂᒃ ᑐᐱᕐᒧᑦ ᓇᐸᔪᓕᐊᕈᑎᒋᔪᒪᓪᓗᒋᑦ, ᖃᒧᑎᒧᓪᓗ ᐊᑐᕈᒪᓪᓗᒋᑦ, ᐊᒻᒪᓗ ᐊᓯᖏᓐᓄᑦ ᓴᓇᕐᕈᑎᓄᑦ ᐊᖑᓇᓱᒍᑎᓄᓪᓗ. ᐊᑯᓂ ᐃᖏᕐᕋᔪᕕᓃᑦ ᐊᒃᓱᕈᕐᓇᖅᑐᒃᑰᖅᓯᒪᓪᓗᑎᒡᓗ; ᐊᑖᑕᖓ ᐃᓐᓇᒻᒪᕆᐊᓘᓕᖅᖢᓂ ᑐᖁᔪᕕᓂᖅ ᐊᒻᒪᓗ ᓄᑕᖅᑲᑦ ᕿᐊᓚᐅᖅᓯᒪᓪᓗᑎᒃ ᐅᓐᓄᐊᒃᑯᑦ ᓂᐅᖏᑦ ᐋᓐᓂᐊᖅᖢᑎᒃ. ᑕᒡᕗᙵᖅᓯᒪᔪᑦ ᑐᒃᑐᑦᑐᓐᓇᖅᓯᒪᓪᓗᑎᒃ ᐊᒥᓱᓂᒃ ᑰᒃᑰᖅᑐᓂᒃ, ᑕᐃᑲᓃᑐᐃᓐᓇᕈᓐᓇᖅᓯᓪᓗᑎᒃ ᖃᑉᓯᑲᓪᓚᖕᓂᒃ ᑕᖅᑭᓂᒃ.

ᐅᑎᖅᐸᓪᓕᐊᓕᕈᕕᑦ ᓯᒡᔭᒧᑦ, ᐃᓱᒪᔪᓐᓇᖅᑐᑎᑦ ᖃᓄᖅ ᐱᓕᕆᓪᓗᐊᖅᑎᒋᖃᑦᑕᓚᐅᕐᒪᖔᑕ ᑕᒪᒃᑯᐊ ᐃᓄᐃᑦ ᐃᓅᓇᓱᐊᕐᓂᕐᒧᑦ – ᐱᖁᑎᒋᔭᑐᐊᕆᓪᓗᒋᑦ ᐅᔭᖅᑲᑦ, ᐊᐳᑎ, ᕿᔪᑦ ᐊᒥᓲᖏᑦᑐᑦ, ᐊᒻᒪᓗ ᐊᒦᑦ ᓴᐅᓃᓪᓗ ᐆᒪᔪᓂᙶᖅᑐᑦ ᐊᖑᓇᓱᒃᓯᒪᔭᒥᓂᒃ. ᐱᐊᓂᒃᓯᒪᔪᑦ ᐊᒻᒪᓗ ᑭᖑᕚᖏᑦ ᐊᒥᓲᓕᖅᓯᒪᔪᑦ ᐅᑭᐅᖅᑕᖅᑐᒥ.