ᖃᒪᓂ’ᑐᐊᑉ ᑰᖓ ᐃᑦᓴᕐᓂᑕᖅ

ᖃᒪᓂ’ᑐᐊᑉ ᑰᖓ ᑲᔾᔮᕐᓇᖅᑐᐊᓗᒃ, ᑕᓯᖃᐅᖅᖢᓂ ᓇᐹᖅᑐᖃᙲᓐᓂᐅᔪᒥ, ᑐᕌᖅᑐᖅ ᖃᒪᓂ’ᑐᐊᕐᒧᑦ.

ᐅᑭᐅᖅᑕᖅᑐᖅ ᐱᐅᔪᐊᓗᒃ ᐊᔾᔨᐅᖏᑦᑑᓪᓗᓂ ᐅᑭᐅᖅᑕᖅᑐᒥ ᐆᒪᔪᖃᕐᓂᐅᔪᖅ. ᐅᒥᖕᒪᓕᒃ, ᖃᐅᓪᓗᖅᑐᓂᒡᓗ ᐊᒪᕈᕐᓂᒃ, ᑐᒃᑐᕙᐃᑦ, ᐊᒃᖤᐃᑦ, ᖃᕝᕖᑦ; ᑭᒡᒐᕖᑦ, ᑭᒡᒐᕕᐊᕐᔪᐃᑦ ᐊᒻᒪᓗ 10,000 ᐅᖓᑖᓃᑦᑐᑦ ᑲᖑᐃᑦ. 275,000 ᐱᕗᓕ ᑐᒃᑐᐃᑦ ᐃᑳᖅᐸᒃᑐᑦ ᑰᖕᒥ ᐊᒥᓲᓪᓗᑎᒃ ᖃᑉᓯᑲᓪᓚᖕᓂ ᐃᓂᒋᔭᐅᔪᓂ ᑐᒃᑐᑦ ᐅᑭᐅᑕᒫᒃᑯᑦ ᓅᑲᑕᖕᓂᖃᖅᐸᒃᑎᓪᓗᒋᑦ.

ᐃᓄᖕᓄᑦ ᖃᒪᓂ’ᑐᐊᕐᒥᐅᑕᓄᑦ, ᑰᒃ ᑐᒃᑐᖃᕋᔪᒃᑐᖅ, ᐃᖃᓗᖕᓂᒡᓗ ᐊᒻᒪᓗ ᐅᒃᐱᕐᓂᒃᑯᑦ ᐃᖢᐊᖅᓯᕚᓪᓕᕈᑕᐅᕙᒃᖢᓂ. ᖃᒪᓂ’ᑐᐊᑉ ᑰᖓ, ᐊᑯᑦᑐᐊᕐᓗ, ᐊᖏᕐᕋᕆᔭᐅᒐᔪᒃᑐᑦ ᑐᒃᑐᑦ ᐃᓄᖏᓐᓄᑦ, ᐊᒻᒪᓗ ᓄᓇᓕᐅᔪᑐᖅ ᓄᓇᓪᓚᑦᑖᕐᒥ ᐃᓄᐃᑦ ᑲᓇᑕᒥ. ᖃᒪᓂ’ᑐᐊᑉ ᑰᖓᑕ ᓯᒡᔭᖏᑦ, ᐱᓗᐊᖅᑐᒥ ᐱᕗᓕ ᓖᒃᒥ ᓯᑐᓂᖓ, ᐊᔾᔨᐅᖏᑦᑐᒻᒪᕆᖕᓂᒃ ᐱᖁᑎᑐᖃᓕᒃ ᐊᒻᒪᓗ ᐃᓄᐃᑦ ᐃᓂᒋᕙᓚᐅᖅᑕᖏᑦ, ᐃᓚᖏᑦ ᑕᐃᒪᙵᓂᐊᓗᒃ 1000-ᖏᓐᓂᒃ ᐅᑭᐅᓂ. ᖃᒪᓂ’ᑐᐊᑉ ᑰᖓ ᐱᒻᒪᕆᐊᓗᒃᑯᑦ ᐊᒃᑐᐊᓂᓕᒃ ᑐᒃᑐ ᐃᓄᖏᓐᓄᑦ, ᖃᒪᓂ’ᑐᐊᕐᒦᖏᓐᓇᕐᓚᓕᖅᑐᓄᑦ ᑰᑉ ᐹᖓᓂ. ᓴᙱᔪᒃᑯᑦ ᐱᔪᒪᓂᕆᓚᐅᖅᑕᖓ ᐊᒻᒪᓗ ᐊᒃᓱᕉᑕᐅᓪᓗᓂ ᑰᒃ ᐃᓕᖅᑯᓯᑐᖃᒍᓪᓗ ᑎᒃᑯᐊᖅᑕᐅᓯᒪᔪᖅ ᑲᓇᑕᒥ ᐃᑦᓴᕐᓂᑕᒃᑯᑦ ᑰᒋᔭᐅᓂᖓ 1990-ᒥ ᑎᒃᑯᐊᖅᑕᐅᓚᐅᖅᑐᖅ.