ᖃᒪᓂ’ᑐᐊᖅ

ᖃᒪᓂ’ᑐᐊᖅ, ᑕᕆᐅᑉ ᓯᒡᔭᖓᓃᖏᑦᑐᑐᐊᖅ ᐃᓄᐃᑦ ᓄᓇᖁᑎᒋᔭᖏᓐᓂᒃ ᐅᑭᐅᖅᑕᖅᑐᒥ, ᑲᓇᑕᐅᑉ ᕿᑎᐅᓃᕐᓚᑦᑎᐊᖅᑐᖅ ᓄᓇᙳᐊᒃᑯᑦ, ᓄᓇᙳᐊᒃᑯᑦ 64’18’41” -ᒦᖦᖢᓂ ᐅᐊᖕᓇᖓᓂ ᐊᒻᒪᓗ 96’04’08” ᑲᓇᖕᓇᖓᓂ.

ᖃᑉᓯᑲᓪᓚᐅᔪᑦ ᑰᒋᔭᐅᔪᑦ, ᓲᕐᓗ ᖃᒪᓂ’ᑐᐊᑉ ᑰᖓ, ᐊᑯᑦᑐᐊᖅ ᐊᒻᒪᓗ ᑐᓕᒫᓕᒡᔪᐊᖅ, ᖃᒪᓂ’ᑐᐊᕐᒧᑦ ᑯᒃᐸᒃᑐᑦ. ᑕᓯᖅ ᐊᒃᑐᐊᓂᖃᕐᒥᔪᖅ ᑕᓯᐅᔭᕐᔪᐊᕐᒧᑦ ᐃᒡᓗᓕᒑᕐᔪᒃᑯᑦ.

ᖃᒪᓂ’ᑐᐊᖅ ᑲᔾᔮᕐᓇᖅᑐᖅ ᐅᑉᓗᒥᐅᓕᖅᑐᒃᑰᕐᓂᖅᓴᐅᓪᓗᑎᒃ ᐅᑭᐅᖅᑕᖅᑐᒥᐅᑕᑦ ᓄᓇᓕᒃ. ᑕᓯᐅᑉ ᓯᒡᔭᖓᒍᑦ ᐱᓱᒃᖢᓂ ᐅᔾᔨᕐᓇᖅᑐᖅ ᓄᓇᖃᖅᑳᖅᓯᒪᔪᑦ ᐃᓂᒋᖃᑦᑕᓚᐅᕐᓂᖓᓄᑦ ᐊᒻᒪᓗ ᓄᓇᓕᐅᑉ ᐱᕈᖅᐸᓪᓕᐊᓂᖓ ᐃᓕᖅᑯᓯᑐᖃᑎᒍᑦ ᐱᑕᖃᖅᖢᓂ ᐅᑉᓗᒥᐅᓕᖅᑐᕐᓗ ᐊᑐᖅᑕᐅᕙᒃᑐᓂᒃ ᐱᑕᖃᒻᒪᕆᒃᖢᓂ.

ᓯᒡᔭᒃᑯᑦ ᑕᑯᓐᓇᖅᑐᖅ ᑐᓚᒃᑕᕐᕕᐅᕙᒃᑐᓂᒃ ᐊᖑᓇᓱᒃᑎᓄᑦ ᐃᖃᓗᖕᓂᐊᖅᑎᓄᓪᓗ. ᓯᒡᔭᖓ ᐃᒡᓗᕋᓛᖃᕈᓘᔭᖅᑐᖅ, ᐃᓄᖕᓄᑦ ᓄᓇᖅᑲᑎᒌᖕᓄᑦ ᓯᕐᓗᐊᕆᔭᐅᔪᑦ ᐃᖃᓗᖕᓂᐊᕈᑎᖏᓐᓄᑦ, ᐅᕝᕙᓘᓐᓃᑦ ᐅᑭᐅᒃᑯᑦ ᐱᖁᑎᖏᓐᓄᑦ.

ᓄᓇᒥ, ᑕᑯᔪᓐᓇᖅᑐᑎᑦ ᐊᔪᕿᖅᑐᐃᔨᒃᑯᑦ ᓄᓇᖓᓂ, ᐱᒻᒪᕆᐅᓂᖅᐹᖑᖃᑕᐅᔪᖅ ᑕᒡᕙᓂ ᓄᓇᓕᐊᓛᕐᒥ. ᑕᐅᕙᓂᒃᑲᓐᓂᖅ ᐊᑯᒪᓕᒃ ᐳᓚᕋᕐᕕᖓᐅᓪᓗᓂ ᐃᓗᓕᖃᖅᑐᖅ ᓂᐅᕕᕐᕕᒃᑯᑦ ᓂᐅᕕᕐᕕᑐᖄᓂ.

ᓂᐅᕕᕐᕕᑐᖃᐅᑉ ᐱᖓᖕᓇᖓᓄᑦ, ᑕᑯᔪᓐᓇᖅᑕᐃᑦ ᓄᑖᖅ ᓂᐅᕕᕐᕕᒃ ᖁᑦᑎᖕᓂᖅᓴᐅᔪᖅ. ᓂᐅᕕᕐᕕᒋᔭᐅᔪᖅ ᒥᖅᑯᓕᖕᓂᒃ ᑭᐴᑎᖃᕐᕕᐅᖃᑦᑕᓚᐅᖅᓯᒪᓪᓗᓂ ᑕᐃᑉᓱᒪᓂᑐᖃᖅ. ᐱᖁᑎᓂᒃ ᖁᓕᕈᐊᖏᓐᓃᑦᑐᖃᖅᑐᖅ ᐊᔾᔨᒌᖏᑦᑑᑕᐅᔪᓂᒃ ᐱᕈᖅᑐᕕᓂᕐᓂᒃ ᒪᒪᖅᑐᓂᒃ ᐊᓐᓄᕌᒃᓴᓄᑦ ᐅᑭᐅᖅᑕᖅᑐᒥ ᐊᓐᓄᕌᓕᐅᕈᑕᐅᔭᒃᑐᓄᑦ.

ᓂᐅᕕᕐᕕᐅᑉ ᐱᖓᖕᓇᖓᓂ ᒥᑦᑕᕐᕕᐅᔪᖅ ᐳᑦᑕᓛᕈᓐᓇᖅᑐᓄᑦ ᑎᖕᒥᓲᓄᑦ. ᑖᑉᑯᐊ ᑎᑭᑎᑦᑎᕙᒃᑐᑦ ᐅᔭᕋᖕᓂᐊᖅᑎᓂᒃ, ᐃᖃᓗᖕᓂᐊᖅᑎᓂᒃ, ᐅᕝᕙᓘᓐᓃᑦ ᐊᓯᖏᓐᓂᒃ ᐳᓚᕋᖅᑎᓂᒃ ᐆᒪᔪᖅᓯᐅᕈᒪᓇᔭᖅᑐᓂᒃ ᐊᒻᒪᓗ ᐃᓕᖅᑯᓯᓕᕆᔨᓂᒃ ᓄᓇᒥ.

ᑕᐃᒪᐅᔪᖅᑕᐅᖅ, ᓄᓇᓕᐅᑉ ᓯᐊᕐᕆᔮᕐᕕᖓ ᐱᙳᐊᕐᕕᖓᓗ, ᓇᓗᒡᕕᖓ, ᐳᑭᖅᑕᓕᒃᑯᓪᓗ ᐱᓕᕆᕝᕕᖓ, ᐊᒻᒪᓗ ᐋᓐᓂᐊᕐᕕᒃ.

ᐋᓐᓂᐊᕐᕕᐅᑉ ᐅᖓᑖᓂ ᓯᕗᓪᓕᖅᐹᖑᖃᑕᐅᔪᑦ ᓇᖕᒥᓂᖅᑖᖅᑐᖅᑕᐅᒪᐅᖅᑐᑦ ᐃᒡᓗᑦ ᖃᒪᓂ’ᑐᐊᕐᒥ. ᑖᑉᑯᐊ ᓇᓗᓇᐃᒃᑯᑕᐅᔪᑦ ᓯᕗᓂᒃᓴᐅᓂᐊᖅᑐᒧᑦ ᐅᑭᐅᖅᑕᖅᑐᒥ, ᐃᒡᓗᒥᒃ ᓇᖕᒥᓂᓖᑦ ᓴᕆᒪᓱᖕᓃᑦ ᐃᓗᒥᐅᑕᕆᔭᐅᓪᓗᑎᒃ ᐃᓄᖕᓄᑦ.

ᐱᖓᖕᓇᖓᓂ ᖃᐅᒻᒪᖅᑯᑎᓕᕆᕝᕕᒃ, ᐅᖅᓱᐊᓗᖕᒥ (ᑎᑭᑎᑕᐅᕙᒃᑐᒥ ᓯᑲᐅᒃᑯᑦ ᐊᐅᔭᒃᑯᑦ) ᐆᒻᒪᖅᑯᑎᓕᐅᖅᐸᒃᑐᖅ.

ᐅᐊᖕᓇᖓᓄᑦ ᑕᑯᒋᐊᕈᕕᑦ, ᓄᓇᓕᐅᑉ ᐅᖓᑖᓄᑦ. ᖃᐃᖅᑐᓂ ᐃᒡᓗᒋᔭᐅᔪᑦ ᐅᖓᑖᓂ, ᑕᑯᔪᓐᓇᖅᑐᑎᑦ ᐊᖏᔪᒥᒃ ᐊᕙᓗᒥ. ᑖᒻᓇ ᐊᐳᑎᖃᖅᑕᐃᓕᒍᑎ, ᐃᓕᔭᐅᓯᒪᔪᖅ ᐊᐳᑎᖃᓗᐊᖅᑕᐃᓕᒪᑎᑦᑎᓂᕐᒧᑦ ᓄᓇᓕᖕᒥ. ᑕᐃᑲᐅᒐᓗᐊᖅᑎᓪᓗᒍ ᐊᕙᓗ, ᐊᐱᔪᒻᒪᕆᐊᓘᖃᑦᑕᖅᑐᖅ ᓱᓕ 3 ᒥᑕ ᐅᖓᑖᓄᑦ. ᐊᕙᓗᓕᐊᖑᓯᒪᔫᑉ ᐅᖓᑖᓂ ᐃᓗᕕᖃᕐᕕᐅᓪᓗᓂ. ᐊᔪᕐᓇᓪᓚᕆᒃᑎᓪᓗᒍ ᐃᓗᑦᑐᖅᑎᕆᔭᕆᐊᖃᖃᑦᑕᕐᓂᕐᒧᑦ ᖁᐊᖑᔪᒧᑦ ᓄᓇᒧᑦ, ᐃᓗᕕᖏᑦ ᓄᓇᐅᑉ ᖄᖓᓃᑦᑐᑦ, ᐅᔭᖅᑲᓄᑦ ᖄᖏᑦ ᐃᓕᐅᖅᑲᐃᕝᕕᐅᓯᒪᓪᓗᑎᒃ.

ᐅᐊᖕᓇᖓᑕ ᐱᖓᖕᓇᖅᐸᓯᖓᓂ ᕼᐊᒻᓚᐅᔫᑉ ᐊᑉᖁᑎᓕᐅᖅᓯᒪᔪᖅ ᓄᓇᒧᑦ White Hills ᑕᓯᕐᒧᑦ. ᐱᓱᓗᒡᕕᒃᓴᑦᑎᐊᕙᒻᒪᕆᐊᓗᒃ, ᐱᑎᕐᓂᒃ ᐅᑉᓗᓕᖕᓂᒃ ᓇᓂᓯᔪᓐᓇᕋᔭᖅᑐᒃᓴᐅᓪᓗᑎᑦ, ᑭᒡᒐᕕᐊᕐᔪᖕᓂᒡᓘᓐᓃᑦ ᑕᑯᓗᑎᑦ, ᐅᕝᕙᓘᓐᓃᑦ ᑐᒃᑐᓂᒃ.