ᐱᒋᐊᕈᑎᒋᓯᒪᔭᖏᑦ

ᖃᒪᓂ’ᑐᐊᑉ  ᑰᖓᑕ  ᐹᖓ  ᐃᓄᖕᓄᑦ  ᑲᑎᕝᕕᐅᒐᔪᒃᓯᒪᔪᖅ  ᐃᓕᖅᑯᓯᑐᖃᑎᒍᑦ,  ᐊᐅᔭᒃᑯᑦ  ᐊᖑᓇᓱᒡᕕᐅᕙᒃᖢᓂ  ᐃᖃᓗᖕᓂᐊᕐᕕᐅᕙᒃᖢᓂᓗ.  ᐃᓅᖃᑎᒌᑦ  ᐃᖏᕐᕋᖃᑦᑕᓚᐅᖅᑐᑦ  ᑰᒃᑯᑦ  ᐅᑭᐅᒃᑯᑦ  ᐃᓂᒋᓂᐊᖅᑕᖏᓐᓄᑦ.  ᐊᑯᑦᑐᐊᖅ,  ᐱᓗᐊᖅᑐᒥ,  ᐃᖏᕐᕋᕝᕕᐅᓪᓚᕆᖃᑦᑕᓚᐅᕐᒥᔪᖅ  ᑐᒃᑐᓕᐊᖅᑐᓄᑦ.

1762-ᒥ,  ᐊᖓᔪᖅᑳᖅ  ᑯᕆᔅᑎᕗ  ᓂᐅᕕᕐᕕᖕᒥᐅᑕᖅ  ᐅᒥᐊᖅᑐᓚᐅᖅᓯᒪᔪᖅ  ᐃᒡᓗᓕᒑᕐᔪᖕᒧᑦ  ᐊᒻᒪᓗ  ᐊᑎᖅᑖᖅᑎᖦᖢᓂᐅᒃ  ᑕᓯᖅ  Sir  William  Baker-ᒥᒃ,  ᐊᐅᓚᑦᑎᔨᒋᔭᐅᖃᑕᐅᔫᑉ  ᓂᐅᕕᖅᑎᓄᑦ  ᐊᑎᖓ.

ᓂᐅᕕᖅᑎᒃᑯᑦ  ᓂᐅᕕᕐᕕᒃᑖᓚᐅᖅᑐᑦ  ᓯᕗᓪᓕᖅᐹᒥ  ᑭᕙᓪᓕᕐᒥ  ᕿᑭᖅᑕᒥ  ᐅᒃᐱᑐᔪᕐᒥ,  ᒫᓐᓇᐅᔪᖅ  ᓄᓇᓕᐅᑉ  ᓂᒋᐊᑕ  ᐱᖓᖕᓇᖅᖠᖓᓃᑦᑐᖅ.  1924-ᒥ,  ᕆᕝᓕᐊᓐ  ᕕᐅᕈᔅ  ᓂᐅᕕᕐᕕᓕᐅᓚᐅᖅᑐᖅ  ᒫᓐᓇᐅᔪᖅ  ᐃᓂᒋᔭᐅᓕᖅᑐᒥ,  ᐊᒻᒪᓗ  ᑕᒪᕐᒥᒃ  ᐊᔪᕿᖅᑐᐃᔨᒃᑯᑦ  ᐃᒃᓯᕋᕐᔪᐊᒃᑯᓪᓗ  ᑐᒃᓯᐊᕐᕕᖏᑦ  ᓇᑉᐸᖅᑎᖅᑕᐅᓪᓗᑎᒃ  ᖃᓂᖓᓂ  1927-ᒥ.  1936-ᒥ,  ᓂᐅᕕᖅᑎᒃᑯᑦ  ᓂᐅᕕᕐᕕᖕᒥᓂ  ᓅᑦᑎᓚᐅᖅᑐᑦ  ᒫᓐᓇᐅᔪᖅ  ᒥᑦᑕᕐᕕᒋᔭᐅᔫᑉ  ᖃᓂᖓᓄᑦ.  ᓂᐅᕕᖅᖢᒍ  ᕆᕝᓕᐊᓐ  ᕕᐅᕈᔅ,  ᐊᒻᒪᓗ  ᖃᑯᒍᙳᕐᒪᑦ  ᐊᐅᓚᑦᑎᓕᓚᐅᖅᖢᑎᒃ  ᓂᐅᕕᕐᕕᖕᒥ  ᒫᓐᓇᐅᔪᖅ  ᕕᐅᕋ  ᐊᑯᒪᓕᒃ  ᐳᓚᕋᕐᕕᐅᓕᖅᑐᒥ.  ᐃᓄᐃᑦ  ᑲᑎᖃᑦᑕᓕᓚᐅᖅᑐᑦ  ᑐᒃᓯᐊᕐᕕᖕᓂ  ᑕᐃᑉᓱᒪᓂᓗ.

1950-ᖏᓐᓂᒃ,  ᑐᒃᑐᖃᓗᐊᕈᓐᓃᖅᑎᓪᓗᒍ  ᐊᒻᒪᓗ  ᐱᕐᓕᖅᐸᓪᓕᐊᓕᖅᑎᓪᓗᒋᑦ,  ᒐᕙᒪᒃᑯᑦ  ᐃᓄᖕᓂᒃ  ᓅᑦᑎᓚᐅᖅᓯᒪᔪᑦ  ᓄᓇᖁᑎᖏᓐᓂᒃ  ᖃᒪᓂ’ᑐᐊᕐᒧᑦ.  ᐊᕐᕕᓂᓖᑦ  ᐃᓅᖃᑎᒌᒃᑐᑦ  ᑕᐃᑉᓱᒪᓂᑐᖃᖅ  ᖃᒪᓂ’ᑐᐊᕐᒥᐅᑕᐅᓕᖅᑐᑦ.  ᐃᖅᑲᐅᒪᔪᑦ  ᐊᒻᒪᓗ  ᐸᐸᑦᑎᓪᓗᑎᒃ  ᐊᒥᓱᓂᒃ  ᐃᓕᖅᑯᓯᑐᖃᑎᒥᓂᙶᖅᑐᓂᒃ  ᑕᐃᑉᓱᒪᓂ.