ᓄᓇᓕᐅᖅᑳᖅᑎᓐᓇᒍ

ᑲᓇᑕᐅᑉ  ᐅᑭᐅᖅᑕᖅᑐᖓ  ᓇᔪᖅᑕᐅᓚᐅᖏᑦᑐᖅ  ᓯᑯᐃᓐᓇᐅᓚᐅᖅᑎᓪᓗᒍ.  ᓯᑯᐃᓐᓈᓘᓚᐅᖅᖢᓂ  ᑲᓇᑕᐅᑉ  ᐅᑭᐅᖅᑕᖅᑐᖓ  ᐊᒻᒪᓗ  ᐅᖁᒪᐃᓐᓂᖓ  ᓄᓇᒨᖓᓪᓗᓂ.  ᓯᑯ  ᐊᐅᖕᒪᑦ  ᓄᓇ  ᑕᒪᕐᒥᓗᒃᑖᖅᑲᔭᖅ  ᐃᒪᐃᓐᓈᓘᓕᖅᖢᓂ  ᖁᑦᑎᒃᓯᕙᓪᓕᐊᔪᓄᑦ  ᐃᒪᕐᓄᑦ.  ᓄᓇ  ᓴᖅᑭᖦᖢᓂ  ᓯᑯᖃᕈᓐᓃᕐᒪᑦ  ᐊᒻᒪᓗ  ᓄᓇᑕᖅᐸᓪᓕᐊᑐᐃᓐᓇᖅᑐᖅ,  ᐃᒪᖃᕐᓂᖅᓴᐅᓚᐅᖅᓯᒪᔫᒐᓗᐊᖅ  ᐅᑉᓗᒥᐅᓂᖅᓴᒥ.  ᓄᑕᐅᖏᓐᓂᖅᐹᖅ  ᐃᑦᓴᕐᓂᑕᖃᕐᕕᕗᑦ  ᓯᒡᔭᒦᑦᑐᒃᓴᐅᔪᑦ  ᓄᓇᒦᓐᓂᖅᓴᐅᓕᖅᓗᑎᒃ.

ᓄᑖᖅ  ᓄᓇ  ᓴᖅᑭᒃᑐᖅ  ᓯᑰᑉ  ᐊᑖᓂ  ᐊᖏᕐᕋᕆᔭᐅᓕᓚᐅᖅᑐᖅ  ᐊᒥᓱᓄᑦ  ᑐᒃᑐᓄᑦ  ᐊᓯᖏᓐᓄᓪᓗ  ᐆᒪᔪᓄᑦ.  ᐃᓄᑐᖃᐃᑦ  ᓄᓇᒧᙵᐅᖃᑦᑕᓚᐅᖅᑐᑦ  ᐊᖑᓇᓱᒋᐊᖅᖢᑎᒃ  ᑐᒃᑐᓕᒻᒪᕆᐊᓗᖕᓂᒃ  8000-ᖏᓐᓂᒃ  4000-ᓄᑦ  ᑕᐃᑉᓱᒪᓂᑐᖃᖅ.  ᓄᓇᖃᓕᓚᐅᕐᒥᔪᑦ  ᐃᓄᑐᖃᐃᑦ,  3800-ᒥ  2800-ᒧᑦ  ᑕᐃᑉᓱᒪᓂᑐᖃᖅ.  ᓅᑲᑕᒃᐸᓚᐅᖅᑐᑦ  ᓂᕿᒃᓴᖅᓯᐅᖅᖢᑎᒃ  ᐊᖑᓇᓱᒃᐸᒃᖢᑎᒃ  ᑐᒃᑐᓂᒃ,  ᐅᒥᖕᒪᖕᓂᒃ,  ᒥᑭᔪᓂᒃ  ᐆᒪᔪᓂᒃ,  ᐊᒻᒪᓗ  ᐃᖃᓗᖕᓂᒃ,  ᐊᒻᒪᓗ  ᐃᓕᑕᕆᔭᐅᓯᒪᕙᒃᑐᑦ  ᓴᓇᕐᕈᑎᖏᑦ  ᐊᖑᓇᓱᒍᑎᖏᑦ  ᓴᓇᓯᒪᖕᒪᑕ  ᒥᑭᔪᓄᑦ  ᐅᔭᖅᑲᓄᑦ.  ᕿᒻᒥᖃᖃᑦᑕᓚᐅᖏᓐᓂᕐᒪᑕ  ᐅᓂᐊᖃᑦᑕᕋᔭᓚᐅᖅᑐᓂᒃ  ᖃᒧᑎᖏᓐᓂᒃ,  ᐊᒻᒪᓗ  ᐅᑭᐅᒃᑯᑦ  ᑐᐱᕐᓃᑉᐸᓚᐅᖅᖢᑎᒃ  ᖃᕐᒪᓂᒃ  ᐊᐱᑎᓄᓪᓘᓐᓃᑦ  ᐊᕙᓗᓕᖅᑐᖅᓯᒪᔪᓂᒃ.

ᐃᓄᑐᖃᐃᑦ  ᑕᐃᒪᐅᖅᑳᖅᑎᓪᓗᒋᑦ,  ᐊᓪᓚᖓᔪᑦ  ᐊᖓᓇᓱᖃᑦᑕᓚᐅᖅᑐᑦ  ᓄᓇᑐᐃᓐᓇᕐᒥ  ᐊᒻᒪᓗ  ᐅᑭᐅᒃᑯᑦ  ᐅᑭᐅᖅᑕᖅᑑᑉ  ᓇᐹᖅᑐᖏᓐᓃᖃᑦᑕᖅᑐᒃᓴᐅᓪᓗᑎᒃ.  ᑕᐃᔭᐅᔪᑦ  ᐃᒪᓐᓇ  ᑑᓕ  ᐃᓄᐃᑦ  ᐊᒻᒪᓗ  ᑭᖑᕚᕆᔭᐅᔪᑦ  ᒫᓐᓇᐅᔪᖅ  ᐃᓄᖁᑎᒋᔭᐅᔪᓄᑦ.  ᐊᖑᓇᓱᒃᑎᓪᓚᕆᐊᓘᓚᐅᖅᑐᑦ  ᕿᓇᓗᒐᕐᓂᒃ,  ᑐᒃᑐᓂᒃ  ᐊᒻᒪᓗ  ᓇᑦᑎᕐᓂᒃ.  ᐅᑭᐅᒃᑯᑦ  ᐃᓅᖃᑦᑕᓚᐅᖅᑐᑦ  ᐃᑭᐊᕈᑕᖃᖅᖢᑎᒃ  ᓄᓇᐅᑉ  ᐊᑖᓃᕐᓚᒃᖢᑎᒃ  ᐃᒡᓗᖏᑦ  ᖁᓛᖃᖅᖢᓂ  ᕿᔪᖕᒥᒃ  ᐅᕝᕙᓘᓐᓃᑦ  ᕿᓇᓗᒐᐃᑦ  ᓴᐅᓂᖏᓐᓂᒃ  ᐊᒻᒪᓗ  ᓄᓇᒥ.  ᐃᒡᓗᕕᒐᓕᐅᕈᓐᓇᖃᑦᑕᓚᐅᕐᒥᔪᑦ,  ᐃᒡᓗᒥᓂᒡᓗ  ᐅᖁᖅᓴᐃᕙᒃᖢᑎᒃ  ᕿᓇᓗᒐᐃᑦ  ᐅᖅᓱᖏᓐᓂᒃ  ᐊᑐᖅᖢᑎᒃ  ᖁᓪᓕᖃᖅᖢᑎᒃ  ᐅᒃᑯᓯᒃᓴᓄᑦ  ᓴᓇᓯᒪᔪᓂᒃ.  ᐊᐅᔭᒃᑯᑦ  ᑐᐱᖅᓯᒪᕙᒃᖢᑎᒃ  ᐅᔭᖅᑲᓄᑦ  ᐸᑐᒃᓯᒪᓪᓗᒋᑦ.  ᑕᕆᐅᕐᒥᐅᑕᐅᒐᓗᐊᑦ  ᖃᒪᓂ’ᑐᐊᓕᐊᖅᑐᑦ  ᑐᒃᑐᓯᐅᕆᐊᖅᖢᑎᒃ  ᐊᒻᒪᓗ  ᖃᒪᓂ’ᑐᐊᑉ  ᑰᖓᑕ  ᖁᑦᑎᖕᓂᖓᓄᑦ  ᕿᔪᒃᓴᖃᕈᒪᓂᕐᒧᑦ.

1800-ᖏᓐᓂ  1900-ᖏᓐᓂᓗ  ᐃᓚᖏᑦ  ᑑᓕ  ᐃᓄᐃᑦ  ᑭᕙᓪᓕᕐᒥᐅᑦ  ᓄᓇᒦᓐᓂᖅᓴᐅᖃᑦᑕᓕᓚᐅᖅᑐᑦ  ᑐᒃᑐᓐᓇᓱᖃᑦᑕᕐᓂᕐᒧᑦ  ᓂᕿᒋᒐᔪᖕᓂᖅᓴᐅᓪᓗᒍ.  ᑐᒃᑐ  ᐃᓄᐃᑦᓚᔭᐅᒐᔪᓚᐅᖅᑐᑦ.  ᑐᒃᑐ  ᐃᓄᐃᑦ  ᓅᑲᑕᖕᓂᖅᓴᐅᖃᑦᑕᓚᐅᖅᑐᑦ  ᑕᕆᐅᕐᒥᐅᑕᐅᔪᓂᒃ;  ᐃᒡᓗᕕᒐᕐᓃᑉᐸᒃᖢᑎᒃ  ᐅᑭᐅᒃᑯᑦ  ᐊᒻᒪᓗ  ᑐᐱᕐᓂ  ᐊᐅᔭᒃᑯᑦ.  ᐊᖑᓇᓱᖕᓂᖅᓴᐅᖃᑦᑕᖅᖢᑎᒃ  ᐅᑭᐊᒃᓵᒃᑯᑦ  ᐱᑎᒃᓯᒃᑯᑦ  ᐱᑕᖅᓯᖃᑦᑕᖅᖢᑎᒃ  ᓇᓗᒃᑐᓂᒃ  ᖃᔭᖅᑐᖅᖢᑎᒃ  ᑐᒃᑐᑦ  ᐃᑳᖅᐸᓪᓕᐊᑎᓪᓗᒋᑦ  ᑐᐊᑦᑐᒃᑯᑦ  ᐃᒪᒃᑯᑦ.  ᑐᒃᑐ  ᐃᓄᐃᑦ  ᒥᑭᒋᐊᖅᑎᑦᑎᐊᕙᐅᓚᐅᖅᑐᑦ  ᐊᒻᒪᓗ  ᐃᖏᕐᕋᕙᒃᖢᑎᒃ  ᐊᑯᓂ  ᑭᐳᖃᑎᖃᕆᐊᖅᑐᖅᖢᑎᒃ  ᑎᕆᒐᓂᐊᕐᔪᖏᓐᓂᒃ  ᖁᑭᐅᑎᓄᑦ  ᐊᒻᒪᓗ  ᑏᓂᒃ  ᑰᒡᔪᐊᕐᒥ.

ᓄᓇᓕᖕᓂ  ᐱᒋᐊᕈᑕᐅᓚᐅᖅᑐᑦ  ᐃᓱᓕᑦᑐᑦ  1920-ᒥ  ᐊᒻᒪᓗ  1930-ᒥ  ᓂᐅᕕᕐᕖᑦ,  ᐳᑭᖅᑕᓖᑦ  ᐊᒻᒪᓗ  ᑐᒃᓯᐊᕐᕖᑦ  ᓴᖅᑭᑎᑕᐅᖕᒪᑕ  ᖃᒪᓂ’ᑐᐊᕐᒥ.  ᐃᓄᐃᑦ  ᓄᓇᑖᖅᖢᑎᒃ  ᖃᒪᓂ’ᑐᐊᕐᒥ  1960  ᕿᑎᐊᓂ  ᖃᒪᓂ’ᑐᐊᕐᒥ,  ᐊᑯᑦᑐᐊᕐᒥ,  ᖃᒪᓂ’ᑐᐊᑉ  ᑰᖓᓂ  ᐊᒻᒪᓗ  ᓴᓐᓂᖓᔪᓕᐅᑉ  ᑰᖓᓂ.